पोखरा, १६ वैशाख । मजदुरको अधिकारका लागि स्थापित संगठन नेपाल ट्रेड युनियन कांग्रेस कास्कीको ७ औं जिल्ला अधिवेशनको गरिने भएको छ ।
उक्त संस्थाद्धारा शनिबार पत्रकार सम्मेलन गरी यही वैशाख १८ गते अर्थात अन्तर्राष्ट्रिय श्रमिक दिवसका दिन अधिवेशन गर्न लागिएको जानकारी जिल्ला अध्यक्ष विजयराज भण्डारीले दिनुभयो ।
जिल्लभर ७ हजारको संख्यामा रहेका श्रमिक आवद्ध रहेको उक्त युनियनको अधिवेशनको उद्घाटन नेपाली कांग्रेसका सहमहामन्त्री जीवन परियार गर्ने बताइएको छ । २५० जना अधिवेशन प्रतिनिधि रहने कार्यक्रममा जिल्लामा आवद्ध १८ वटा प्रतिष्ठानबाट पर्यवेक्षकका रुपमा सहभागिता रहने सचिव रुद्रप्रसाद तिमिल्सिनाले जानकारी दिनुभयो ।
श्रमिकहरुको हक अधिकार प्राप्ति, समस्या समाधानको लागि संगठित प्रजातान्त्रिक विचार धारामा विश्वास गर्ने श्रमिकहरुको एकतामा अधिवेशनले जोड दिने वताइएको छ । ४ वर्षे कार्यकाल रहने नयाँ नेतृत्व आवद्ध १८ वटा प्रतिष्ठानबाट आएका प्रतिनिधिबाट चुनिने छ । नयाँ नेतृत्व चयनसँगै केन्द्रीय प्रतिनिधि, प्रदेश प्रतिनिधि, महिला समिति, युवा समिति समेत चयन हुने जानकारी पत्रकार सम्मेलनमा दिइएको छ ।
सो अवसरमा नेपाल ट्रेड युनियन कांग्रेस गण्डकी प्रदेश अध्यक्ष मुरारी शर्माले दिनानुदिन श्रमिकलाई राज्यले उपेक्षा गरिरहेको चर्चा चलिरहँदा नेपाल ट्रेड युनियन कांग्रेसले श्रमिक मैत्री राज्यको नारा बोकेर अगाडि वढेको बताउनुभयो ।
नेपाली काँग्रेस गण्डकी प्रदेशका सदस्य रमेश पौडेल, नेका महाधिवेशन प्रतिनिधि कुलदेवी बराल, केन्द्रीय सदस्य जीतबहादुर गुरुङ लगायतले आफ्नो भनाई राख्नुभएको थियो । श्रमिकका मुद्दा राजनीतिक दलले कमजोर बनाउने काम गरे चुप लागेर नबस्ने चेतावनी समेत सो अवसरमा दिइएको थियो ।
