काठमाडौँ । ताइवानले अमेरिकाबाट ४०० वटा एन्टी शिप हार्पुन मिसाइल किन्ने भएको छ । उसले चीनको सामना गर्न यी क्षेप्यास्त्रहरू प्रयोग गर्नेछ । ताइवानले हालै अमेरिकासँग ४०० एन्टी-शिप मिसाइलका लागि १.१७ अर्ब डलरको सम्झौता घोषणा गरेको थियो । तर, यो अवधिमा पेन्टागनले कुन देशसँग सम्झौता गरेको हो भन्ने बताएको छैन ।
ब्लूमबर्गको रिपोर्टका अनुसार ताइवान यी मिसाइलहरूको खरिदकर्ता हो । सम्झौताको घोषणासँगै पेन्टागनले क्षेप्यास्त्रको उत्पादन सन् २०२९ सम्ममा सम्पन्न गर्ने बताएको छ । यसअघि ताइवानले जहाजबाट प्रक्षेपण गर्न सकिने हार्पुन मिसाइल पनि किनेको छ । यी एन्टी शिप मिसाइलहरु अमेरिकाको बोइङ कम्पनीले बनाएको हो ।
ब्लुमबर्गले युएस(ताइवान बिजनेस काउन्सिलका अध्यक्ष रुपर्ट ह्यामन्ड(चेम्बर्सलाई उद्धृत गर्दै बोइङसँग एन्टी-शिप मिसाइलका लागि पनि सम्झौता भएको बताएको छ ।
यसैगरी, यो सम्झौताअघि कम्पनीलाई हार्पुन कोस्टल डिफेन्स सिस्टमसँग सम्बन्धित प्रक्षेपण उपकरण बनाउन ४९ करोड ८० लाख डलरको ठेक्का पनि दिइएको छ । यसमा मोबाइल ट्रान्सपोर्टरहरू, रडारहरू र प्रशिक्षण उपकरणहरू समावेश छन् । पेन्टागनले यस विषयमा कुनै पनि बयान दिन अस्वीकार गरेको छ ।
ताइवानको रक्षा मन्त्रालयका प्रवक्ता सुन ली–फाङले यस खरिदबारे जानकारी पहिल्यै दिएको थियो । ताइवानले सन् २०२० मा पनि अमेरिकाबाट हार्पुन मिसाइल किन्न इच्छा व्यक्त गरेको थियो ।
अप्रिल ८ मा चीनले ताइवानको फुजियान प्रान्तको पिङटान टापु नजिकै ४ वटा क्षेत्रमा सैन्य अभ्यास सुरु गरेको थियो । तीन दिने अभ्यासमा कुल १७२ चिनियाँ लडाकु विमान उडेका थिए । यस क्रममा चीनको पिपुल्स लिबरेसन आर्मी (पीएलए) ले प्रत्यक्ष गोलाबारुद प्रयोग गरेको थियो । ताइवानकी राष्ट्रपति साइ इङ वेनको अमेरिकी सभामुख म्याकार्थीसँगको भेटपछि चीन आक्रोशित हुदै ताइवान नजिक सैन्य अभ्यास गरेको थियो ।
