सार्वजनिक स्थानमा हतियार प्रर्दशन गरेको अभियोगमा पक्राउ परेका युवामाथि बाँके प्रहरीले अभद्र व्यवहारसम्बन्धी मुद्दा चलाउने भएको छ।
नेपालगञ्जमा हतियार प्रदर्शन गरेको भिडिओ बाहिरिएपछि प्रहरीले चक्रे मिलन समूहका युवा गणेशबहादुर बोगटीलाई सोमबार राति पक्राउ गरेको थियो।
जिल्ला प्रहरी प्रवक्ता डिएसपी रामबहादुर घर्तीले बोगटीलाई अभद्र व्यवहारसम्बन्धी मुद्दा चलाइएको बताए। बोगटीलाई मंगलबार दिउँसो म्याद थपका लागि जिल्ला अदालत पठाइएको उनले जानकारी दिए। केही दिन थुनामा राखेर घटना अनुसन्धान गर्नका म्याद थप्न लागिएको डिएसपी घर्तीले बताए।
आइतबार चक्रे मिलनसहित केही युवाहरू होटलबाट बाहिरिँदै गरेको भिडिओ बाहिरिएको थियो। जसमा बोगटीले बन्दुक बोकेका थिए। उनले बन्दुक बोकेको भिडिओ सामाजिक सञ्जाललगायत राखेपछि प्रहरीले उनलाई पक्राउ गरेको हो।
