काठमाडौं । एसईई परीक्षामा आज पनि धनुषामा गम्भीर त्रुटि भएको छ । आज भइरहेको एसईई परीक्षामा नेपाली विषयको प्रश्नपत्र पुग्नुपर्ने ठाउँमा विज्ञानको प्रश्नपत्र पुगेको हो ।
विज्ञानको परीक्षा चैत २२ गते बुधबार रहेको छ । तर, धनुषाको रामप्रसाद माविमा विज्ञान विषयको प्रश्नपत्र पुगेपछि अहिले त्यहाँ नेपालीको प्रश्नपत्र पठाउने तयारी भइरहेको बताइएको छ ।
धनुषा जिल्लाका प्रमुख जिल्ला अधिकारी काशीराज दाहालले खाममा नेपाली लेखिए पनि भित्र भने विज्ञान विषयको प्रश्नपत्र भेटिएको जानकारी दिए । यसअघि एसईईको पहिलो दिन १७ गते धनुषाकै औरही गाउँपालिकामा रहेको चक्कर मावि परीक्षा केन्द्रमा अंग्रेजीको प्रश्नपत्र पुग्नुपर्नेमा नेपालीको पुगेको थियो ।
