काठमाडौं । राष्ट्रपति रामचन्द्र पौडेलले शनिबार शीतल निवासमा संघीय सांसद र प्रदेश सांसदहरूको सम्मानमा चियापानको आयोजना गरेका थिए ।
चियापानमा प्रायः सबै दलका नेता र सांसद उपस्थित भए । तर एमाले अध्यक्ष केपी ओली भने गएनन् । उनले राष्ट्रपति पौडेलले पहिलोपल्ट आयोजना गरेको चियापान नै बहिष्कार गरे ।
आफ्नो पार्टीकी पूर्वउपाध्यक्ष विद्यादेवी भण्डारी शीतल निवासबाट बाहिरिएलगत्तै ओलीले राष्ट्रपतिको चियापान बहिष्कार गरेका हुन् । यसअघि राष्ट्रपतिको पद तथा शपथ कार्यक्रममा ओली शीतल निवास गएका थिए । तर शनिबार भने उनी गएनन् ।
राष्ट्रपति कार्यालयले सबैलाई निम्ता पठाएको थियो । ओलीलाई पनि निम्ता नपठाउने कुरै भएन । तर ओलीले चियापान कार्यक्रममा सहभागिता नजनाएर आफ्नो अहं देखाएको टिप्पणी हुन थालेको छ ।
यदि कांग्रेस सरकारमा गएमा एमाले प्रमुख प्रतिपक्षी दल नै हुनेछ । ओली विपक्षी दलको नेता हुनेछन् । राज्य सञ्चालनमा विपक्षी दलको भूमिका र सहयोगको आवश्यकता पर्छ । कतिपय विषयमा राष्ट्रपतिसँग छलफल गर्नुपर्ने हुन्छ । यसअघि कांग्रेस सभापति विपक्षी दलको नेता भए पनि राष्ट्रपति विद्यादेवी भण्डारीलाई भेट्न पुगेकै थिए । तर ओलीले सुरुमै राष्ट्रपति पौडेलप्रति अनुदार चरित्र प्रस्तुत गरेका छन् ।
भण्डारी राष्ट्रपति हुँदा ओली घन्टौंसम्म शीतल निवासमा हुन्थे । हप्ता बिराएर ओली शीतल निवास पुगिरहन्थे । पार्टी सञ्चालनका विषयमा भण्डारीसँग रायसुझावका लागि ओली पुग्ने गरेको एमाले नेताहरु बताउँछन् । अहिले नेपाली कांग्रेसबाट उम्मेदवारी दिएका वरिष्ठ नेता पौडेल राष्ट्रपति बनेसँगै ओलीले छोइछिटो गरेका छन् ।
राष्ट्रपति निर्वाचनअघि पौडेलप्रति अन्टसन्ट बोलेकाले मुख देखाउन गाह्रो भएकाले ओली शीतल निवासमा आयोजित चियापानमा नगएको कांग्रेस नेताहरुको भनाइ छ ।
