गण्डकी प्रदेश प्रमुख पृथ्वीमान गुरुङले भाषा, संस्कार र संस्कृतिको जगेर्नामा ताङतिङ अगाडि रहेको कुरा बताउनुभएको छ । कास्कीको मादी गाउँपालिकास्थित ताङतिङमा अवस्थित नौंचु पैंगीलामा महायान बौद्व गुम्बाको शुक्रबार उद्घाटन प्रदेश प्रमुख गुरुङले भन्नुभयो–‘बुद्धको पूजा गर्दैमा बौद्व धर्मलम्वी नहुने र असली बौद्व धर्मलम्वी हुन बुद्धको पंचशीललाई आफ्नो जीवनमा लागु गर्नु पर्छ ।’
उत्त: गुम्बा गत असारमा पुनर्निर्माण गरिएको थियो । ‘पञ्चायत कालमा धार्मिक स्वतन्त्रता थिएन । तर मुलुकमा व्यवस्था परिवर्तन भएपछि सबै जातजातिहरुले आफ्नो भाषा, संस्कार र संस्कृतिको विकास गर्न पाएका छन् ।’ उहाँले भन्नुभयो –‘फलस्वरूप अहिले जुन सुकै गुरुङ गाउँ जानु त्यहाँ अत्याधुनिक गुम्बा निर्माण भएको छ ।’
गण्डकी प्रदेश सरकारका कृषि, उर्जा तथा जलस्रोत मन्त्री वेदबहादुर गुरुङले जन्मभूमि आउदा स्थानीयले देखाएको मायाले आफू खुशी भएको बताउँदै उहाँले मादी २ र ६ जोड्ने मादीनदीको पुल, र निर्माणाधीन खेलमैदानको अवलोकन गर्नुभएको थियो ।
साथै उहाँले धार्मिक स्थलको रुपमा परिचित नौचु डांडालाई पर्यटकीय रुपमा चिनाउने आफ्नो सपना रहेको बततउनुभयो । ‘यति सुन्दर प्राकृतिक गार्डेनमा अब एउटा कृत्रिम पोखरी बनाउने योजना छ । यस ठाउँलाई अझै ब्यबस्थित बनाएपछि पर्यटक ओइरिन्छन् ।’ गुरुङले भन्नुभयो। आफू मादीको अध्यक्ष हुँदा क्रपू क्षेत्रमा पर्यटक ल्याउन थुप्रै काम अगाडि सारेको दाबी समेत गर्नुभयो ।
कार्यक्रममा मादी गाउँपालिकाका प्रमुख देबीजंग गुरुङ, उपप्रमुख कल्पना गुरुङ लगायतले आफ्नो भनाइ राखेका थिए । कार्यक्रममा गुम्बा निर्माण व्यवस्थापन समितिका कार्यवाहक अध्यक्ष वीर्जमान गुरुङले गुम्बा निर्माण कार्यका बारेमा प्रकाश पार्नुभएको थियो ।
