काठमाडौं । नेपाली कांग्रेसका महामन्त्री गगन थापाले दलहरूबीच मन्त्रालयका लागि रस्साकस्सी भएको बताएका छन् । शुक्रबार संघीय संसद् भवनमा उपराष्ट्रपतिको मतदान गरेर फर्कने क्रममा पत्रकारहरूसँग संक्षिप्त कुराकानी गर्दै उनले गठबन्धनमा रहेका सबै दलमा मन्त्रालयका विषयमा रस्साकस्सी चलिरहेको खुलासा गरे ।
‘मन्त्रीका विषयमा सबै दललाई चासो हुनु स्वाभाविक पनि हो । हुनु पनि पर्छ । हामीलाई पनि कांग्रेसले पाउने मन्त्रालयका बारेमा बढी चासो छ । एकीकृत समाजवादीले त एक नम्बर मन्त्रालयमा आफ्नो दाबी रहेको भनिसक्यो । त्यसैले कसरी जाने भन्ने कुरा छलफल हुन बाँकी छ,’ उनले भने ।
महामन्त्री थापाले चैत ५ गतेको संसद् बैठकअघि नै नेपाली कांग्रेसले औपचारिक निर्णय गरेर सत्ता पक्षको कुर्सीमा बस्नुपर्ने बताए । ‘कांग्रेसले सरकारमा जाने भइसकेपछि भोलि वा पर्सि कहिले हुन्छ बैठक बसेर सत्ता पक्षको कुर्सीमा बस्दा उचित हुन्छ । सुल्टो बाटो हिँड्दा नै सबैलाई राम्रो हुन्छ । यहाँ केही असमझादारीका विषय पनि देखिएका छन् । त्यसैले त्यसलाई क्लियर गर्न पनि कांग्रेसले औपचारिक निर्णय गरेर सत्तापक्षको कुर्सीमा बस्दा हुन्छ,’ थापाले भने ।
