काठमाडौं । प्रधानमन्त्री पुष्पकमल दाहाल प्रचण्डले आगामी चैत ६ गते विश्वासको मत लिने भएका छन् । चैत ५ गतेसम्म राष्ट्रपति र उपराष्ट्रपति निर्वाचनको आचारसंहिता सकिने भएकाले प्रचण्डले त्यसको भोलिपल्ट विश्वासको मत लिने भएका हुन् ।
कान्तिपुर टेलिभिजनसँगको कुराकानीमा खानेपानीमन्त्री अब्दुल खानले प्रधानमन्त्रीले चैत ६ गते विश्वासको मत लिने जानकारी दिएका हुन् । उनका अनुसार प्रधानमन्त्रीले चैत ६ गते विश्वासको मत लिने तय भएको र विश्वासको मतपछि मात्रै मन्त्रिपरिषद विस्तार हुनेछ ।
एमाले र राप्रपाले सरकारलाई दिएको समर्थन फिर्ता लिँदै सरकारबाट बाहिरिएपछि अल्पमतमा परेका प्रधानमन्त्री प्रचण्डले प्रतिनिधिसभाबाट दोस्रोपटक विश्वासको मत लिने भएका हुन् । राष्ट्रपति निर्वाचनमा नेपाली कांग्रेससँगको नयाँ राजनीतिक समीकरण बनेपछि एमाले र राप्रपा सरकारबाट बाहिरिएका थिए । फागुन १३ देखि ३० दिनभित्र विश्वासको मत लिनुपर्ने संवैधानिक व्यवस्थाअनुसार प्रधानमन्त्री प्रचण्डले चैत ६ गते विश्वासको मत लिन लागेका हुन् ।
यसअघि उनले पुस २६ गते संसदबाट विश्वासको मत लिएका थिए । तत्कालीन प्रमुख प्रतिपक्षी नेपाली कांग्रेसले समेत प्रचण्डलाई विश्वासको मत दिएको थियो । त्यसबेला उनलाई कांग्रेस, माओवादी केन्द्र, एमाले, जनमत, राष्ट्रिय स्वतन्त्र पार्टी, राप्रपा, नागरिक उन्मुक्ति पार्टी, जसपा, तीन स्वतन्त्र सांसदले विश्वासको मत दिएका थिए ।
नेपाली कांग्रेसले बुधबार प्रधानमन्त्री प्रचण्डले विश्वासको मत लिएपछि मात्र सरकारमा जाने निर्णय गरेको थियो ।
