छोराछोरीको स्थानमा आफूलाई राखेर हेर्नुस् अनि मात्र उनीहरुलाई बुझ्न सकिन्छ । कहिलेकाहीँ साथीभाइमाझ बसेर अनुभव गर्नुस अनि मात्र उनीहरुको समस्या र खुबी बुझ्न सजिलो हुन्छ । अन्यथा छोराछोरी तपाईंको लागि कहिल्यै बिसाउन नमिल्ने घाँडो सावित हुन्छन् ।
याद राख्नुस्— यसको मतलब उनीहरु जे जे चाहन्छन् खुरुखुरु पूर्ति गर्नु भनेको होइन । उनीहरु जे जे चाहन्छन् त्यसलाई उनीहरु आफै प्राप्त गर्ने वातावरणको निर्माण गर्नु नै आमाबाबुको बुद्धिमानी हो । सन्तानले साइकल–मोटरसाइकलको लागि पैसा माग्छन् भने यस पैसाको बापत आमाबाबाको लागि के गर्न सकिन्छ भनेर सोध्नुस् । सित्तैमा केही पनि पाइँदैन त्यसैले परिश्रम गरेर मात्र पैसा पाइन्छ भन्ने महसुस गराउनु नै बुद्धिमानी हुनेछ ।
अर्काे शब्दमा — उनीहरुलाई ऋण त दिनुहुन्छ तर सित्तैमा उनीहरुको फर्माइस पूरा गर्नु हुँदैन । हामीले देखिरहेकै छौँ कि कसैले एक कप चिया खुवाउँदा धन्यवाद दिने हाम्रो सन्तानले आमाबाबुले लाखौँ कप चिया खुवाइसक्दा पनि एउटा धन्यवाद दिँदैनन् । अतः उनीहरुलाई धन्यभागी बन्न सिकाउनुहोस् । आमाबाबा नरिवलजस्तै बाहिर कठोर र भित्र नरम हुनुपर्दछ ।
साभारः ‘नव सफलता शास्त्र २’ पुस्तकबाट
