कथा कुथुङ्ग्री सबभन्दा पुरानो असरदार मनोचिकित्सा हो । त्यस्तै यो संसारकै पहिलो शिक्षा सामग्री पनि हो । अक्षरको आविष्कार हुनुअघिदेखि नै कथाकहानीको माध्यमबाट मान्छेले परम्परागत ज्ञान हस्तान्तरण गर्दै आएका छन् ।
बढी टिभी हेर्ने बच्चाबच्चीभन्दा कथा सुन्नेहरु चनाखो, बुद्धिमान एवम् कल्पनाशील भएको पाइएको छ । बच्चाबच्ीलाई सीधै आदेश र उपदेश दिइयो भने उनीहरु यसको उल्टो गरेरै दम लिन्छन् । यो उनीहरुको धृष्टता हैन, स्वभाव हो ।
त्यसैले कथाकहानीको माध्यमबाट आदेश र उपदेश दिने कला हरेक आमा–बाबाले सिक्नै पर्दछ । अन्यथा तनाव र हैरानीको मुख्य कारण नै तपाईंका सन्तान हुनेछन् । त्यसैले हरेक बेलुकी छोराछोरीलाई कथा सुनाएर सुताउने अनुष्ठान थाल्नुस् अथवा बिहान उठ्नासाथ कथाको पुस्तक पढेर सुनाउनुस् । कथाको सन्देश के हो त्यो भने उनीहरुलाई ठम्याउने मौका दिनुस् । उनीहरुको दिमाग बलियो हुँदै जान्छ ।
साभारः ‘नव सफलता शास्त्र २’ पुस्तकबाट
