पोखरा, ४ फागुन । गण्डकी प्रदेश प्रमुख पृथ्वीमान गुरुङले गण्डकी प्रदेश सरकारलाई जनताका घरदैलोमा पुगेर उनीहरुका चहना पूरा गर्न सुझाव दिनुभएको छ ।
गण्डकी प्रदेश सरकार स्थापना दिवसको अवसरमा गण्डकी प्रदेश सरकारद्धारा बिहीबार पोखरामा आयोजित शुभकामना कार्यक्रममा बोल्दै प्रदेश प्रमुख पृथ्वीमान गुरुङले त्यस्तो सुझाव दिनुभएको हो । गण्डकी प्रदेशका सरकारले परिणममुखी माम गरी यस क्षेत्रका जनताको समृद्धिमा ध्यान दिन आग्रह समेत गर्नुभयो ।
विविधता र पर्यटकीय क्षेत्र गण्डकी प्रदेशको समृद्धिका लागि प्रदेश सरकार सबै राजनीतिक दल र जनतासँग हातेमालो गर्दै अगाडि वढ्नु पर्नेमा उहाँको जोड थियो । परिवर्तनबाट प्राप्त उपलब्धिलाई रक्षा गर्दै ऐन कानून बनाई आम नागरिकलाई सुशासनको प्रत्याभूति दिलाउने पनि प्रदेश सरकारको प्रमुख दायित्व रहेको भनाई उहाँको छ ।
गण्डकी प्रदेशका सभामुख कृष्णप्रसाद धितालले समयमै प्रदेश एने कानून बनाएर सुशासन र समृद्धिको बाटो तर्फ प्रदेश सरकार अगाडि वढ्नु पर्नेमा जोड दिनुभयो ।
गण्डकी प्रदेशका पूर्व मुख्यमन्त्री पृथ्वीसुब्बा गुरुङले केन्द्र सरकारले प्रदेशलाई अधिकार सम्पन्न बनाउन नचाहने भएकाले प्रदेशलाई अधिकार सम्पन्न बनाउने तर्फ सबै राजनीतिक दलहरुको जोड बल आवश्यक भएको बताउनुभयो । गण्डकी प्रदेशका निवर्तमान मुख्यमन्त्री कृष्णचन्द्र नेपालीले यस क्षेत्रका विकास निर्माणका कार्यलाई समयमै सम्पन्न गर्नेतर्फ प्रदेश सरकारको ध्यान जान आवश्यक भएको बताउनुभयो ।
उच्च अदालत पोखराका मुख्य न्यायाधीश डिल्लीराम आचार्यले कानून जान्नु र कानून मान्नु हामी सबैको दायित्व भएकाले कानूनका बारेमा आम नागरिकलाई सचेतना गराउन जरुरी भएको बताउनुभयो । प्रभावकारी न्यायका लागि सबै क्षेत्रबाट सहयोगको अपेक्षा न्यायलयले गरिरहेको भनाई उहाँको छ । विपक्षी दलका नेता सुरेन्द्र पाण्डेले सडक र सदनबाट संविधान माथि प्रहार भइरहेको अवस्थामा संविधान र संघीयताको रक्षाका लागि लोकतान्त्रवादी पार्टीहरु एकजुट भएर अगाडि वढ्न जरुरी रहेको बताउनुभयो । गण्डकस्ी प्रदेशका आन्तरिक मामिला मन्त्री रोशन गाहले समयमै प्रदेश ऐन कानून बनाएर यसक्षेत्रका जनताको समृद्धि तर्फ अगाडि वढ्न जरुरी भएको बताउनु भयो ।
गण्डकी प्रदेशका मुख्यमन्त्री खगराज अधिकारीको अध्यक्षतामा भएको उक्त कार्यक्रमको समापन गर्दै मुख्यमन्त्री अधिकारीले सबैको सहयोगबाट नै यस क्षेत्रका जनताको जीवनस्तर उकास्न सकिने बताउनुभयो ।
