काठमाडौं । एमाले अध्यक्ष केपी ओलीको गृहजिल्ला झापामा अहिले राजावादीहरूको चहलपहल छ । पूर्वराजा ज्ञानेन्द्र शाहको परिवार नै यतिबेला झापामा छ । एमाले केन्द्रीय सदस्य दुर्गा प्रसाईको नेतृत्वमा पूर्वराजपरिवारले मेचीबाट नागरिक बचाउ अभियान सुरु भएको छ । पूर्वराजा ज्ञानेन्द्र र पूर्वयवुराज पारसलाई सँगै राखेर दुर्गा प्रसाईंले नागरिक बचाउ अभियान सुरु गरेका हुन् ।
काँकडभिट्टाको मेची पुलमा आयोजित सभामा सोमबार राजपरिवारका अन्य सदस्यहरू उपस्थित थिए । उद्घाटन कार्यक्रमलाई पूर्वराजा शाहले सम्बोधन भने गरेनन् । पूर्वराजा शाह दमकस्थित चिया बगान फर्किएका छन् । उनी आज दमकबाटै यो कार्यक्रम उद्घाटन गर्न काँकडभित्ता पुगेका थिए। केही समयअघि प्रसाईले पूर्वराजा शाह र पारसलाई भेटेर आफूले नागरिक बचाउ अभियान सुरु गर्ने र त्यसको उदघाटन गरिदिन निमन्त्रणा दिएका थिए ।
प्रसाईंले कार्यक्रममा सहभागी हुन पूर्वराजा शाहसहित प्रधानमन्त्री पुष्पकमल दाहाल प्रचण्ड, नेपाली कांग्रेसका सभापति शेरबहादुर देउवा, एमाले अध्यक्ष केपी ओली, राष्ट्रिय प्रजातन्त्र पार्टीका अध्यक्ष राजेन्द्र लिङ्देन, राष्ट्रिय स्वतन्त्र पार्टीका अध्यक्ष रवि लामिछानेलगायतलाई निम्ता दिएका थिए। तर, झापामै रहेका ओली उक्त कार्यक्रममा सहभागी भएनन् । ओली आइतबार झापा पुगेका थिए । उनी झापामै रहेका बेला पूर्वराजा शाहले हिन्दु राज्य पुनस्र्थापना अभियान सुरु गर्नुलाई अर्थपूर्ण रूपमा लिइएको छ ।
मेडिकल माफिया प्रसाई एमाले केन्द्रीय सदस्य पनि हुन् । उनी ओलीसँग निकै टिकट छन् । अहिले उनले सुरु गरेको अभियानलाई एमालेको पनि मौन समर्थन रहेको हुन सक्ने अनुमान गरिएको छ । ओली पछिल्लो समय धार्मिक गतिविधिमा धेरै सक्रिय हुन थालेका छन् । कम्युनिस्ट पार्टी भए पनि ओली राजसंस्था र हिन्दु राज्य पुनस्र्थापनाको पक्षमा नरम मानिन्छन् । त्यही भएर यो अभियान हिन्दु राज्य पुनस्थार्पनाकै लागि दरबारको अप्रत्यक्ष सहयोगमा सञ्चालित भएको अनुमान गरिएको छ । अभियान मेचीदेखि महाकालीसम्म हुने प्रसाईले बताएका छन् ।
एमाले अध्यक्ष ओली र राप्रपा अध्यक्ष राजेन्द्र लिङ्देन दुवै झापाका हुन् । राप्रपा संवैधानिक राजसंस्था चाहिन्छ भनेर हिँडेको छ । सो पार्टीले प्रतिनिधिसभामै राजसंस्था फर्काउने घोषणा गरिसकेको छ । राप्रपाले सदनमा नारा घन्काउनु र झापामा पूर्वराजपरिवार एउटै मञ्चमा उपस्थित हुनुलाई विभिन्न ढंगले व्याख्या गर्न थालिएको छ ।
