साह्रै गरीब परिवारमा जन्मेको कारण सेम वाल्टनले सात वर्षको स्कुल जाने उमेरमा अखबार बेची पेट पाल्नुपरेको थियो । त्यसपछि उनले ससाना थुप्रै काम गरेर गुजारा गरेका थिए । यसै क्रममा उनको तीखो दिमागले ठम्यायो कि अरुले भन्दा भिन्नै तर नौलो काम नगरेसम्म सफलता पाइँदैन ।
यही ठम्याइलाई साकार पार्न उनले सबभन्दा राम्रो माल सबभन्दा सस्तो दाममा ग्राहकलाई उपलब्ध गराउने अभूतपूर्व विचार ल्याए । यसै नयाँ सोचकै कारण सन् १९८५ मा अमेरिकाको सबभन्दा धनी मान्छेको सूचीमा परे ।
वाल्टनको सफलताको रहस्य के थियो भने उनी नियमित अरु स्टोर्सहरु घुम्थे र त्यहाँका राम्रा पक्षहरुलाई टिपेर ल्याउँथे । त्यसपछि त्यसमाथि चिन्तन मनन गरी छुट्टै निष्कर्ष निकाल्थे र त्यसलाई आफ्नो वालमार्ट स्टोर्समा प्रयोग गर्थे ।
साभारः ‘नव सफलता शास्त्रा’ पुस्तकबाट
