काठमाडौं । नेपाली कांग्रेसका निवर्तमान सभापति तथा पूर्वप्रधानमन्त्री शेरबहादुर देउवा भोलि काठमाडौं फर्किने भएका छन्। उनको स्वदेश आगमनलाई लक्षित गर्दै कांग्रेसको संस्थापनइतर समूहले विमानस्थलदेखि निवाससम्म स्वागतको तयारी गरेको छ।
देउवा थाइल्यान्डको बैंककबाट थाइ एअरवेजको उडान नम्बर टीजी ३१९ मार्फत भोलि दिउँसो १२ः२५ बजे त्रिभुवन अन्तर्राष्ट्रिय विमानस्थलमा अवतरण गर्ने कार्यक्रम रहेको बताइएको छ। विमानस्थलमा देउवालाई कांग्रेस संस्थापनइतर समूहका संयोजक डा। शशांक कोइरालाको नेतृत्वमा नेता तथा कार्यकर्ताले स्वागत गर्ने तयारी गरिएको छ। त्यसपछि उनलाई महाराजगञ्जस्थित चुनदेवी नजिकै रहेको भाडाको निवाससम्म पुर्याइने बताइएको छ।
गत भदौ २४ गते भएको विध्वंसका क्रममा बूढानीलकण्ठस्थित देउवा निवासमा लुटपाट, आगजनी तथा कुटपिट भएपछि देउवा दम्पतीले हाल भाडाको निवासबाट बस्दै आएका छन्। स्वास्थ्य उपचारका क्रममा देउवा दम्पती केही समयदेखि नेपालबाहिर रहेका थिए। उनीहरू उपचारका लागि सिंगापुर हुँदै हङकङ पुगेका थिए। आगामी फागुनमा हुने आमनिर्वाचनको तयारी भइरहेका बेला देउवाको स्वदेश फिर्तीलाई कांग्रेसभित्र राजनीतिक रूपमा समेत चासोका साथ हेरिएको छ। उनको आगमनसँगै पार्टीको आन्तरिक गतिविधि तथा आगामी राजनीतिक रणनीतिबारे छलफल थप सक्रिय हुने अपेक्षा गरिएको छ।
यसैबीच, देउवाको स्वागतका लागि संस्थापनइतर समूहले नेता–कार्यकर्ताको सहभागिता बढाउने तयारी गरेको छ। विमानस्थलदेखि निवाससम्मको स्वागत कार्यक्रमलाई व्यवस्थित बनाउन समूहले आन्तरिक समन्वयसमेत गरिरहेको बताइएको छ।
