काठमाडौं । प्रधानमन्त्री बालेन्द्र साहलाई जलवायु परिवर्तनसम्बन्धी संयुक्त राष्ट्रसंघीय शिखर सम्मेलन (कोप–३१) मा सहभागी हुन टर्कीका राष्ट्रपति रेसेप तैयप एर्दोगानले निमन्त्रणा पठाएका छन्।
बुधबार सिंहदरबारमा बसेको राष्ट्रियसभाको विकास, आर्थिक मामिला तथा सुशासन समितिको बैठकमा परराष्ट्र मन्त्रालयका सहसचिव कृष्णप्रसाद ढकालले प्रधानमन्त्री साहलाई कोप–३१ मा सहभागी हुन निमन्त्रणा प्राप्त भएको जानकारी दिए।
उनका अनुसार टर्कीका राष्ट्रपतिबाट प्राप्त उक्त निमन्त्रणा परराष्ट्र मन्त्रालयले प्रधानमन्त्री तथा मन्त्रिपरिषद्को कार्यालयमा पठाइसकेको छ। यद्यपि सम्मेलनमा नेपालबाट प्रधानमन्त्रीकै तहमा सहभागिता हुने वा अन्य तहबाट प्रतिनिधित्व गराइने भन्ने टुंगो लाग्न बाँकी रहेको उनले बताए।
“कोप–३१ मा नेपालको सहभागिताका सन्दर्भमा सम्माननीय प्रधानमन्त्रीज्यूलाई निमन्त्रणा प्राप्त भएको छ। टर्कीका सम्माननीय राष्ट्रपतिज्यूबाट निमन्त्रणा प्राप्त भएको हो। त्यो निमन्त्रणा हामीले प्रधानमन्त्री तथा मन्त्रिपरिषद्को कार्यालयमा पठाइसकेका छौँ,” सहसचिव ढकालले भने, “कुन तहबाट सहभागिता हुने भन्ने विषय हामीलाई जानकारी हुन बाँकी नै छ। हामी त्यसको प्रतीक्षामा छौँ।”
कोप–३१ सन् २०२६ नोभेम्बर ९ देखि २० सम्म टर्कीको अन्ताल्यामा आयोजना हुँदैछ। सम्मेलनमा नेपालले जलवायु न्याय, जलवायुजन्य हानि तथा नोक्सानीको क्षतिपूर्ति र पर्वतीय क्षेत्रका मुद्दालाई प्राथमिकताका साथ उठाउने तयारी गरेको छ।
