काठमाडौँ । कृष्णप्रसाद भट्टराई स्मृति कराते प्रतियोगितामा विभागीय टोली नेपाल पुलिस क्लबले तीन तथा एपिएफ क्लबले दुई स्वर्ण पदक जितेका छन् । ललितपुरको सातदोबाटोस्थित कराते एकेडेमीको हलमा आज भएको उक्त प्रतियोगितामा महिला एकल कातामा पुलिसकी चन्चला दनुवारले स्वर्ण पदक जित्नुभयो भने उहाँ सम्मिलित टोलीले टिम कातामा पनि स्वर्ण पदक जितेको हो ।
कुमुतेतर्फ पुलिसकी पुष्पका लामाले ४५ केजी तौल समूहमा स्वर्ण पदक जित्नुभयो । पुष्पकाले फाइनलमा त्रिभुवन आर्मी क्लबकी ममता महर्जनलाई ४–१ ले हराउनुभयो । एपिएफकी दीपा लामा र प्रदेश १ की प्रतिममा राईले कास्य पदक जित्नुभयो । महिला एकल कातामा कर्णालीकी एलिशा मगरले रजत तथा बागमतकी मीरा खाती र प्रदेश १ की रोश्मा राईले कास्य पदक जित्नुभयो । महिला टिम कातामा आर्मीले रजत तथा एपिएफ र बागमतीले कास्य पदक जित्यो ।
पुरुषतर्फ एपिएफका सोनिम मानन्धरले पुरुष एकल कातामा र उहाँ सम्मलित टोलीले टिम कातामा स्वर्ण पदक जित्यो । एकल कातामा पुलिसका महसुस मोक्तानले रजत तथा बागमतीका रेहान जाभेद र आर्मीका विजय लिम्बूले कास्य पदक जित्नुभयो । गोदावारी नगरपालिकाद्वारा आयोजित कृष्णप्रसाद भट्टराई खेल महोत्सव–२०७९ अन्तर्गत नेपाल कराते महासङ्घ जिल्ला प्रमुख डोजो ललितपुरले सञ्चालन गरिरहेको राष्ट्रिय कराते प्रतियोगितामा विभिन्न १० टोलीको सहभागिता रहेको छ । प्रतियोगिता यही माघ २८ गतेसम्म चल्नेछ ।
