काठमाडौँ । सरकारले चालु आर्थिक वर्षको बजेटमार्फत घोषणा गरेको ‘करदाता प्रोत्साहन उपहार कार्यक्रम’ औपचारिक रूपमा सुरु गरेको छ।
अर्थ मन्त्रालयमा शुक्रबार आयोजित कार्यक्रममा साउन १ देखि १५ गतेसम्मका विजेताको घोषणा गर्दै कार्यक्रमको शुभारम्भ गरिएको हो। वस्तु तथा सेवा खरिद–बिक्रीमा बिल लिने–दिने संस्कारलाई प्रोत्साहन गर्दै अर्थतन्त्रलाई औपचारिक, पारदर्शी र कर प्रणालीलाई प्रभावकारी बनाउने उद्देश्यले कार्यक्रम सञ्चालन गरिएको सरकारले जनाएको छ। मूल्य अभिवृद्धि कर (भ्याट)लाई राजस्वको दिगो स्रोतका रूपमा विकास गर्ने लक्ष्य पनि यससँग जोडिएको छ।
आन्तरिक राजस्व विभागका अनुसार साउन १ देखि १५ गतेसम्मका १६ जना विजेता छनोट भएका छन्। प्रत्येक दिनका एक–एक जना गरी १५ जना दैनिक विजेता र एक जना बम्पर विजेता रहेका छन्। दैनिक विजेताले १ लाख १२ हजार ३७४ रुपैयाँ र बम्पर विजेताले १० लाख रुपैयाँ पुरस्कार प्राप्त गर्नेछन्।
विभागका महानिर्देशक डा. भीष्मकुमार भुसालले विजेताको छनोट ‘क्रिप्टोग्राफिकली सेक्युर्ड युनिफर्म र्यान्डम स्याम्पलिङ’ प्रविधिबाट गरिएको जानकारी दिए। यो पूर्ण रूपमा कम्प्युटरमा आधारित प्रणाली भएकाले छनोट प्रक्रियामा कुनै मानवीय हस्तक्षेप वा विभेद नहुने उनको भनाइ छ।
विभागका अनुसार साउन १ देखि १५ गतेसम्म उपभोक्ताले गरेका ७ हजार ७७ वटा नगद कारोबार प्रणालीमा दर्ता भएका छन्, जसको कुल मूल्य ८ करोड २४ लाख रुपैयाँ रहेको छ। यी कारोबारमा ३ हजार ९१५ विक्रेता सहभागी छन्।
यही अवधिमा अनलाइन भुक्तानीमार्फत २ करोड ५६ लाख ८ हजारभन्दा बढी कारोबार भएका छन्, जसको कुल मूल्य ७६ अर्ब ६० करोड ३ लाख रुपैयाँ बराबर रहेको विभागले जनाएको छ। अनलाइन भुक्तानीबाट भएका कारोबार भने स्वतः उपहार कार्यक्रममा समावेश हुने भएकाले छुट्टै विवरण दर्ता गर्नुपर्ने व्यवस्था छैन।
विजेताको कुपन नम्बर र संक्षिप्त विवरण विभागको वेबसाइटमा सार्वजनिक गरिनेछ। व्यक्तिगत गोपनीयतालाई ध्यानमा राख्दै विजेताको पूरा नाम र मोबाइल नम्बर भने सार्वजनिक नगरिने विभागले जनाएको छ। पुरस्कार जित्ने उपभोक्ताले १५ दिनभित्र नजिकको आन्तरिक राजस्व कार्यालयमा गई पुरस्कार दाबी गर्न सक्नेछन्।
साउनको पहिलो १५ दिनको बम्पर उपहार शिव कृष्ण जेनरल स्टोरबाट २५० रुपैयाँ बराबरको सामान खरिद गरेका एक उपभोक्ताले जितेका छन्। उहाँले १० लाख रुपैयाँ पुरस्कार प्राप्त गर्ने विभागले जनाएको छ।
