काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेले राष्ट्रपति रामचन्द्र पौडेलसँग शीतल निवासमा भेटवार्ता गरेका छन्।बुधबार राष्ट्रपति भवन शीतल निवासमा भएको भेटमा समसामयिक राजनीतिक अवस्था, सुनसरीको देवानगन्जमा भएको घटनापछि विकसित परिस्थितिलगायत समसामयिक विषयमा छलफल भएको राष्ट्रपति कार्यालयले जनाएको छ।
राष्ट्रपति पौडेलको सचिवालयका अनुसार सभापति लामिछानेले सुनसरी घटनाका विषयमा छलफल गर्न राष्ट्रपतिले बोलाएको सर्वदलीय बैठकबारे आफ्नो धारणा तथा जानकारी पनि गराएका थिए।
भेटका क्रममा पछिल्लो राजनीतिक घटनाक्रम, शान्ति–सुरक्षा अवस्था तथा राष्ट्रिय महत्वका विषयमा समेत विचार आदान–प्रदान भएको जनाइएको छ।सुनसरीको देवानगन्जमा भएको घटनापछि उत्पन्न परिस्थितिलाई मध्यनजर गर्दै राष्ट्रपतिले प्रमुख राजनीतिक दलहरूसँग छलफललाई तीव्रता दिएका छन्।
