काठमाडौँ । मुलुककै पहिलो सडक सुरुङमार्ग नागढुङ्गा–सिस्नेखोला सुरुङमार्गको सोमबार औपचारिक उद्घाटन गरिएको छ।
पूर्वाधार विकासमन्त्री सुनिल लम्साल र जापान अन्तर्राष्ट्रिय सहयोग नियोग (जाइका)का अध्यक्ष तानाका अकिहिकोले नेपालस्थित जापानी राजदूत माएदा तोरुसँग संयुक्त रूपमा सुरुङमार्गको उद्घाटन गरेका हुन्।
सुरुङमार्ग निर्माण आयोजनाका अनुसार पहिलो चरणमा एम्बुलेन्स, दमकल तथा सुरक्षा निकायका आपत्कालीन सवारीसाधनलाई मात्र सुरुङमार्ग प्रयोग गर्न दिइनेछ। त्यसपछि परीक्षणको नतिजाका आधारमा अन्य सवारीसाधनलाई क्रमिक रूपमा सञ्चालनको अनुमति दिइनेछ।
आयोजनाले करिब एक सातादेखि १० दिनसम्म अत्यावश्यक सवारीसाधनमार्फत सुरुङमार्गको परीक्षण गर्ने जनाएको छ। परीक्षण अवधिभर ती सवारीसाधनबाट कुनै शुल्क नलिइने र सुरक्षा तथा प्राविधिक परीक्षण सफल भएपछि सर्वसाधारणका सवारीसाधनलाई पनि सञ्चालन अनुमति दिइनेछ।
सुरुङमार्ग प्रयोगबापत सरकारले सवारीको प्रकार र यात्राको दिशाअनुसार फरक–फरक टोल शुल्क निर्धारण गरिसकेको छ। कार, भ्यान, पिकअप, ट्र्याक्टर, माइक्रोबस तथा अन्य हलुका सवारीसाधनका लागि काठमाडौँ प्रवेश गर्दा ६५ रुपैयाँ र बाहिरिँदा ६० रुपैयाँ शुल्क तोकिएको छ।
त्यस्तै, मिनीबस तथा मिनी टिपर/ट्रकका लागि प्रवेश गर्दा ११५ रुपैयाँ र बाहिरिँदा ८० रुपैयाँ, बस तथा सिङ्गल रियर एक्सल ट्रकका लागि प्रवेश गर्दा २६० रुपैयाँ र बाहिरिँदा २०० रुपैयाँ शुल्क निर्धारण गरिएको छ। मल्टी एक्सल ट्रक तथा भारी उपकरण बोकेका सवारीसाधनका लागि प्रवेश शुल्क ६०० रुपैयाँ र बाहिरिने शुल्क २५० रुपैयाँ तोकिएको छ।
भुक्तानीलाई सहज बनाउन आरएफआईडी प्रविधिमा आधारित ‘एन–ट्याग’ तथा नगद दुवै माध्यमबाट शुल्क तिर्न सकिने व्यवस्था गरिएको छ। दुईपांग्रे, तीनपांग्रे, पैदलयात्री तथा डिजेल, पेट्रोल वा ग्यासजस्ता अत्यधिक प्रज्वलनशील पदार्थ बोकेका सवारीसाधनलाई भने सुरुङमार्ग प्रयोग गर्न निषेध गरिएको छ।
जापानको करिब २१ अर्ब ५० करोड रुपैयाँ सहुलियतपूर्ण ऋण र नेपाल सरकारको करिब ६ अर्ब रुपैयाँ लगानीमा निर्माण भएको यो सुरुङमार्गको सञ्चालन तथा व्यवस्थापनको जिम्मेवारी युसिन एआरटी जेभीले पाँच वर्षका लागि पाएको छ।
तत्कालीन प्रधानमन्त्री केपी शर्मा ओलीले २०७६ कात्तिकमा शिलान्यास गरेको यो आयोजना कोभिड–१९ महामारीलगायत विभिन्न कारणले निर्धारित समयभन्दा ढिलो गरी सम्पन्न भएको हो।
