कीर्तिपुरस्थित सशस्त्र प्रहरी बलको विद्यालयमा ११ करोड आर्थिक हिनामिना आरोपमा विद्यालयका लेखा प्रमुखसहित दुई जनालाई प्रहरीले पक्राउ गरेको छ।
पक्राउ पर्नेमा विद्यालयमा कार्यरत इन्स्पेक्टर तथा लेखा प्रमुख कल्पना गुरुङ र लिला लामा रहेका छन्।
उनीहरूलाई शनिबार पक्राउ गरिएको जिल्ला प्रहरी परिसर काठमाडौंका प्रवक्ता एसपी पवनकुमार भट्टराईले जानकारी दिए। ‘दुई जनालाई हिजो पक्राउ गरेका हौं। आज अदालतबाट म्याद थप गरी थप अनुसन्धान अघि बढाउँछौं,’ एसपी भट्टराईले भने।
सशस्त्र प्रहरी मुख्यालयले विद्यालयमा आर्थिक अनियमितता भएको निष्कर्षसहित कानुनी कारबाहीका लागि जिल्ला प्रहरी परिसर काठमाडौंलाई पत्राचार गरेपछि प्रहरीले उनीहरूलाई पक्राउ गरेको हो।
अनुसन्धानका क्रममा विद्यालयको खातामा रहनुपर्ने रकम व्यक्तिगत खातामा राखेर करोडौं रुपैयाँ हिनामिना गरिएको आशंका गरिएको छ। यस प्रकरणको मुख्य योजनाकार लेखा प्रमुख कल्पना गुरुङ रहेको प्रारम्भिक अनुसन्धानबाट खुलेको प्रहरी स्रोतले जनाएको छ।
यसअघि सशस्त्र प्रहरी मुख्यालयले आन्तरिक छानबिन गरेको थियो। छानबिनमा गुरुङसहित सम्बन्धित व्यक्तिहरूको संलग्नता देखिएपछि फौजदारी अनुसन्धान र मुद्दा चलाउन प्रहरीलाई जिम्मा लगाइएको हो।
गुरुङ विगत छ वर्षदेखि उक्त विद्यालयमा लेखापाल तथा लेखा प्रमुखको जिम्मेवारीमा कार्यरत रहेको बताइएको छ। घटनामा सशस्त्र प्रहरीको कल्याण शाखामा कार्यरत महेन्द्र हमाल पनि छानबिनको दायरामा परेका छन्। प्रहरीले घटनामा अन्य व्यक्तिको संलग्नता भए–नभएको विषयमा पनि अनुसन्धान जारी रहेको जनाएको छ।
