दूध कसरी के मिलाएर पिउँदा फाइदा पुग्छ ?
– बेलुका या रातको समयमा दूधमा शुद्ध बेसार मिलाई पिउने गरे सुपाच्य, कम कफकारक र पेटको रोग विरुद्ध लड्ने क्षमतामा वृद्धि हुन्छ । बेसार स्वयम्मा शक्तिशाली एन्टीबायोटिक हो ।
– जाडो मौसममा दूध पिउँदा सुठो मिसाई पिउने गर्दा त्यसले जाडोसँग लड्ने क्षमता प्रदान गर्छ ।
– पटकपटक उमालेर बासी राखी दूध पिएमा त्यो अत्यन्त गरिष्ठ र अपाच्य हुनुका साथै त्यसले कब्जियत उब्जाउने भय रहन्छ ।
– दूध पिउनेबित्तिकै सुत्नु राम्रो हुँदैन । दूध पिएपछि केही बेर यताउता हिँडडुल गरेर मात्र सुत्ने गर्नुपर्दछ । त्यसो नगरे अजीर्ण हुने सम्भावना बढेर जान्छ ।
– राति सुत्नुभन्दा केही घण्टापूर्व पिएको दूध पथ्य मानिएको छ । आरोग्य शास्त्रले भन्छ— ‘रात्रौ पथ्यमनेकरोगशमनं चक्षुर्हित संस्मृतम् ।’ अर्थात्, राति पिएको दूध पथ्य हुन्छ । त्यो अनेकौँ समस्याको समाधान गर्नेवाला र नेत्रज्योति वृद्धिमा अमृतसमान हुन्छ ।
साभारः ‘खाने कसरी पिउने कसरी’ पुस्तकबाट
