देशका ११ जिल्लाका ८२ स्थानमा बर्ड फ्लुको संक्रमण पुष्टि भएपछि पशु सेवा विभागले उच्च सतर्कता अपनाउन आग्रह गरेको छ ।
पशु सेवा विभागका महानिर्देशक डा. उमेश दाहालका अनुसार पछिल्लो तीन महिनादेखि विभिन्न स्थानमा बर्ड फ्लु (एच५एन१) देखिँदै आएको छ । नियन्त्रणका लागि संघ, प्रदेश र स्थानीय तहसँग समन्वय गरी विशेष अभियान सञ्चालन गरिएको उनले बताए ।
२०८२ चैत ४ गते मोरङमा पहिलोपटक पुष्टि भएको संक्रमण हाल झापा, मोरङ, सुनसरी, महोत्तरी, बारा, चितवन, नवलपरासी, काठमाडौं, भक्तपुर, ललितपुर र काभ्रेपलाञ्चोकमा फैलिएको विभागले जनाएको छ । हालसम्म ५ लाख ६९ हजार ८५८ पन्छी नष्ट गरिएको छ भने ९ लाख ८९ हजार ३१३ अण्डा र १ लाख ९५ हजार ४८५ किलोग्राम दाना नष्ट गरिएको छ ।
कोशी प्रदेशमा संक्रमण नियन्त्रणमा आएको जनाइएको छ । तर काठमाडौं उपत्यकाका केही स्थानमा भने संक्रमण देखिएको विभागले जनाएको छ ।
विभागले जोखिम क्षेत्रहरूमा निगरानी बढाएको, पशु क्वारेन्टाइन कार्यालयहरूलाई उच्च सतर्कतामा राखिएको तथा अवैध रूपमा भित्रिएका पन्छी नष्ट गरिएको जनाएको छ ।
पन्छीपालक किसानलाई जैविक सुरक्षा उपाय कडाइका साथ अपनाउन, पुराना क्रेट पुनः प्रयोग नगर्न र ढुवानीका साधन निसंक्रमण गरेर मात्र प्रयोग गर्न आग्रह गरिएको छ ।
त्यसैगरी, जंगली पन्छी र घरपालुवा पन्छीबीच सम्पर्क रोक्न तथा पन्छी ओसारपसार गर्दा भेटेरिनरी प्रमाणपत्र अनिवार्य रूपमा लिन विभागले आग्रह गरेको छ ।
विभागका अनुसार बर्ड फ्लुसँगै अन्य पन्छी रोगहरूको जोखिम पनि बढेकाले नियमित खोप र सतर्कता आवश्यक रहेको छ । कुनै पनि फार्ममा अस्वाभाविक मृत्यु वा बिरामी देखिएमा तुरुन्तै नजिकको पशु सेवा कार्यालयलाई जानकारी गराउन आग्रह गरिएको छ ।
