विज्ञान, प्रविधि तथा नवप्रवर्तनमन्त्री महावीर पुनले मन्त्रीको जिम्मेवारी सम्हालेपछि आफूले नियमित रूपमा सहभागी हुँदै आएको ‘प्रिय कक्षा’ छुटेको बताएका छन्। संसदमा बोल्दै मन्त्री पुनले मन्त्रालयको काम र संसदीय दायित्वका कारण आफू सधैँ उपस्थित हुन नसकेको उल्लेख गर्दै त्यसबाट असहज महसुस भएको बताए। उनले यसप्रति क्षमायाचना समेत व्यक्त गरे।
“मन्त्री बनेपछि समय व्यवस्थापन चुनौतीपूर्ण बनेको छ। त्यसैले मेरो प्रिय कक्षा नियमित रूपमा सञ्चालन गर्न सकिएको छैन,” उनले भने।
मन्त्री पुनले विज्ञान, प्रविधि तथा नवप्रवर्तन मन्त्रालयलाई चालु आर्थिक वर्षका लागि ४ अर्ब रुपैयाँ बजेट विनियोजन भएको जानकारी दिँदै त्यसको ठूलो हिस्सा अझै कार्यक्रममार्फत कार्यान्वयन गर्न बाँकी रहेको बताए।
उनका अनुसार प्राप्त बजेटमध्ये करिब साढे ३ अर्ब रुपैयाँको कार्यक्रम तथा योजना तयार गर्ने काम अझै सम्पन्न हुन सकेको छैन। मन्त्रालय अहिले ती बजेटलाई प्रभावकारी ढंगले उपयोग गर्ने कार्यक्रम निर्माण र कार्यान्वयनको तयारीमा केन्द्रित रहेको उनले बताए। नवप्रवर्तन, अनुसन्धान तथा प्रविधि विकासलाई प्राथमिकता दिएर बजेट खर्च गर्ने योजना रहेको उल्लेख गर्दै मन्त्री पुनले उपलब्ध स्रोतलाई परिणाममुखी बनाउने दिशामा मन्त्रालयले काम गरिरहेको बताए।
