उपराष्ट्रपति कार्यालयका सचिव कृष्णहरि पुष्करलाई प्रहरीले करिब सात घण्टा नियन्त्रणमा लिएर रिहा गरेको घटनाले कर्मचारी प्रशासनमा चर्चा र चासोको विषय बनेको छ।
काठमाडौं उपत्यका अपराध अनुसन्धान कार्यालयले सचिव पुष्करलाई बिहीबार साँझ काठमाडौंको कपनस्थित निवासबाट नियन्त्रणमा लिएको थियो।
प्रहरी स्रोतका अनुसार प्रधानमन्त्रीलाई निजी सन्देश पठाएर प्रशासनिक ‘चेन अफ कमान्ड’ उल्लंघन गरेको उजुरीका आधारमा उनीमाथि सोधपुछ गरिएको थियो।
असार २४ गते सचिव पदबाट अनिवार्य अवकाशमा जान लागेका पुष्करले प्रधानमन्त्रीसँग भेटघाटका लागि पटक–पटक प्रयास गरे पनि सफल नभएपछि निजी मोबाइल नम्बरमा सन्देश पठाएको बताइएको छ।
प्रहरीले घटनाबारे सोधपुछ तथा आवश्यक अनुसन्धान गरेपछि मुद्दा चलाउनुपर्ने पर्याप्त आधार नदेखिएको निष्कर्ष निकाल्दै बिहीबार राति नै उनलाई पत्नीको जिम्मा लगाएर रिहा गरेको थियो।
यस घटनापछि उच्च प्रशासनिक तहका कर्मचारीहरूबीच सरकारी कर्मचारीको अभिव्यक्ति, कार्यसम्पादन र प्रशासनिक प्रक्रियासम्बन्धी विषयमा व्यापक चर्चा सुरु भएको छ।
