काठमाडौँ । सरकारले आगामी आर्थिक वर्षको बजेटमार्फत सुनको भन्सार महसुल बढाउने घोषणा गरेपछि त्यसको प्रत्यक्ष असर नेपाली बजारमा देखिएको छ। आइतबार सुनको मूल्य एकैदिन प्रतितोला २० हजार ५०० रुपैयाँले बढ्दै नयाँ उचाइमा पुगेको छ।
नेपाल सुनचाँदी व्यवसायी महासंघका अनुसार छापावाल सुन प्रतितोला ३ लाख ११ हजार १०० रुपैयाँमा कारोबार भइरहेको छ। यसअघि जेठ १५ गते सुनको मूल्य प्रतितोला २ लाख ९० हजार ६०० रुपैयाँ थियो।
भन्सार दरमा १० प्रतिशत वृद्धि गर्ने सरकारी निर्णयपछि बजार मूल्यमा उल्लेखनीय वृद्धि भएको व्यवसायीहरूको भनाइ छ। नयाँ मूल्यअनुसार १० ग्राम सुनको मूल्य २ लाख ६६ हजार ७२० रुपैयाँ कायम भएको छ। केही दिनअघि यही परिमाणको सुन २ लाख ४९ हजार १४० रुपैयाँमा कारोबार भएको थियो।
सुनसँगै चाँदीको मूल्य पनि बढेको छ। महासंघका अनुसार चाँदी प्रतितोला ५ हजार ३४५ रुपैयाँ पुगेको छ, जुन जेठ १५ गतेको तुलनामा बढी हो। त्यसबेला चाँदी प्रतितोला ५ हजार ४० रुपैयाँमा कारोबार भएको थियो।
हाल १० ग्राम चाँदीको मूल्य ४ हजार ५८३ रुपैयाँ निर्धारण गरिएको छ। व्यवसायीहरूले सरकारी कर तथा भन्सार नीतिमा भएको परिवर्तनका कारण बजारमा मूल्य समायोजन भएको बताएका छन्।
सुनचाँदी बजारका जानकारहरूका अनुसार आगामी दिनमा अन्तर्राष्ट्रिय बजारको अवस्था र सरकारी नीतिको प्रभावका आधारमा मूल्यमा थप उतारचढाव आउन सक्ने सम्भावना रहेको छ।
