काठमाडौँ । इजरायलका प्रमुख विमानस्थलहरूमा ठूलो सङ्ख्यामा अमेरिकी सैन्य विमान तैनाथ गरिएको अन्तर्राष्ट्रिय सञ्चारमाध्यमले जनाएका छन् । बेन गुरिओन र रामोन विमानस्थलमा दर्जनौँ अमेरिकी लडाकु तथा आकाशमै इन्धन भर्ने विमान देखिएको बताइएको छ ।
ती विमानहरूको उपस्थितिका कारण नियमित उडानसमेत प्रभावित हुन थालेको उल्लेख गरिएको छ । इरानसँग युद्धविराम घोषणा भए पनि अमेरिकी विमानहरू अझै इजरायलमै रहेको र तत्काल फिर्ता लैजाने संकेत नदेखिएको जनाइएको छ ।
यसैबीच अमेरिका र इरानबीच तनाव कायमै रहे पनि वार्ताको प्रयास जारी रहेको बताइएको छ । दुवै पक्षले मध्यस्थकर्तामार्फत सम्भावित समझदारीका लागि पहल गरिरहेका भए पनि ठोस सहमति भएको छैन ।
तेहरानमा भने सम्भावित समझदारीप्रति आशा बढेको देखिएको छ । यही अपेक्षाका कारण इरानी मुद्राको मूल्य यस साता करिब ५ प्रतिशतले बढेको बताइएको छ ।
इरानको अर्थतन्त्रमा युद्धको जोखिम, अमेरिकी दबाब र नाकाबन्दीका कारण गम्भीर असर परेको छ । बजारमा आपूर्तिमा समस्या देखिएको र मूल्य निरन्तर परिवर्तन भइरहेको व्यापारीहरूले बताएका छन् ।
अल जजिराको प्रतिवेदनअनुसार इरान सम्भावित नयाँ युद्धको तयारीमा जुटिरहेको छ । तेहरानले होर्मुज जलडमरूमध्यलाई आफ्नो प्रमुख रणनीतिक दबाब उपकरणका रूपमा हेर्दै आएको उल्लेख गरिएको छ ।
इरान अहिले सैन्य तयारी, आन्तरिक समर्थन सुदृढीकरण र कूटनीतिक पहल गरी तीन मोर्चामा सक्रिय रहेको बताइएको छ । सम्भावित आक्रमण भए अमेरिकी सैन्य अड्डा र ऊर्जा संरचनामा लक्ष्य हुन सक्ने चेतावनीसमेत इरानी पक्षले दिएको छ ।
