वीरगञ्जस्थित मालपोत कार्यालय पर्सामा नक्कली रसिद प्रयोग गरी लाखौँ रुपैयाँ सरकारी राजश्व हिनामिना गरेको अभियोगमा एक जना लेखापढी व्यवसायी पक्राउ परेका छन् । पक्राउ पर्नेमा वीरगञ्जको ‘शुभ लाभ लेखापढी’ फर्मका सञ्चालक ओमप्रकाश यादव रहेका छन् ।
मालपोत कार्यालय स्रोतका अनुसार उक्त फर्म यसअघि मालपोत कार्यालय पर्साका पूर्व अधिकृत हरिनारायण मिश्राका सहोदर भाइ शम्भु मिश्राले सञ्चालन गर्दै आएका थिए । राजनीतिमा सक्रिय भएपछि मिश्राले आफ्नो विश्वासपात्र मानिएका यादवलाई फर्मको जिम्मेवारी सुम्पेका थिए । यद्यपि, फर्ममा मिश्राको आउजाउ भने कायमै रहेको बताइएको छ । शम्भु मिश्र वीरगञ्ज महानगरपालिका–२६ का निर्वाचित वडा अध्यक्ष हुन् ।
मालपोत कार्यालय पर्साका प्रमुख खेमराज खत्रीका अनुसार यादवविरुद्ध ४ लाख ७२ हजार रुपैयाँ बराबरको राजश्व हिनामिना गरेको भन्दै बुधबार कार्यालयमा लिखित उजुरी परेको थियो । उजुरीपछि गरिएको प्रारम्भिक छानबिनमा नक्कली रसिद प्रयोग गरी सरकारी राजश्व छली गरिएको तथ्य फेला परेको कार्यालयले जनाएको छ ।
“नक्कली रसिदमार्फत सरकारी राजश्व हिनामिना भएको पुष्टि भएपछि कानुनी कारबाहीका लागि जिल्ला प्रहरी कार्यालय पर्सामा जाहेरी दिएका हौँ,” प्रमुख खत्रीले बताए ।
मालपोत कार्यालयको जाहेरीपछि जिल्ला प्रहरी कार्यालय पर्साले यादवलाई नियन्त्रणमा लिई अनुसन्धान अघि बढाएको छ । प्रहरी स्रोतका अनुसार सरकारी कागजात किर्ते गरी राजश्व हिनामिना गरेको कसुरमा थप अनुसन्धान भइरहेको छ । घटनामा अन्य व्यक्तिको समेत संलग्नता हुनसक्ने आशंकामा अनुसन्धानको दायरा विस्तार गरिएको प्रहरीले जनाएको छ ।
यसअघि पनि विभिन्न विवादमा मुछिएका यादवविरुद्ध जिल्ला अदालत पर्सामा अर्को मुद्दा विचाराधीन अवस्थामै रहेको बुझिएको छ ।
प्रशासनिक निकायमा आफ्नो राम्रो पहुँच रहेको दाबी गर्दै आएका वडा अध्यक्ष मिश्रासँग जोडिएको लेखापढी फर्ममै यस्तो घटना सार्वजनिक भएपछि वीरगञ्जको प्रशासनिक वृत्तमा यो प्रकरणलाई गम्भीर रूपमा हेरिएको छ ।
