खोटाङ। माध्यमिक शिक्षा परीक्षा (एसइई)मा यहाँको हलेसी तुवाचुङ नगरपालिका–९ सल्लेस्थित जनता माध्यमिक विद्यालयको नतिजा शून्य भएको छ । राष्ट्रिय परीक्षा बोर्डले सार्वजनिक गरेको नतिजाअनुसार उक्त विद्यालयका १२ विद्यार्थी एसइईमा सहभागी भएकामा १२ जना नै अनुत्तीर्ण भएका हुन् ।
दश स्थानीय तह रहेको जिल्लामा ६५ दशमलव ४२ प्रतिशत विद्यार्थीले एसइई उत्तीर्ण गरेका छन् । शिक्षा विकास तथा समन्वय इकाइले दिएको जानकारीअनुसार यस वर्ष अघिल्लो वर्षभन्दा १० दशमलव ७३ प्रतिशतले एसइईको नतिजामा सुधार आएको छ ।
गत वर्षको एसइईमा जिल्लाभर ५४ दशमलव ६९ प्रतिशत विद्यार्थीले मात्र एसइई उत्तीर्ण गरेका थिए । यस वर्ष जिल्लाका एक सय पाँच वटा माध्यमिक विद्यालयबाट दुई हजार ८५७ जना विद्यार्थी एसइईमा सहभागी भएका थिए ।
साधारण धारतर्फ दुई हजार ४५२ जना सहभागी भएकामा एक हजार ६५५ जना विद्यार्थी उत्तीर्ण भएका छन् । जसमा तीन दशमलव छ देखि चार जिपिएसम्म ७२ जना, तीन दशमलव दुईदेखि तीन दशमलव छसम्म दुई सय ३७ जना, दुई दशमलव आठदेखि तीन दशमलव दुईसम्म छ सय ६५ जना, दुई दशमलव चारदेखि दुई दशमलव आठसम्म छ सय १८ जना, दुईदेखि दुई दशमलव चारसम्म ५८ जना, एक दशमलव छदेखि दुई जिपिए ल्याउने पाँच र अवर्गीकृत सात सय ९७ जना विद्यार्थी रहेका छन् ।
यस्तै, प्राविधिक धारतर्फ एक ५४ जना विद्यार्थीमा ३२ दशमलव ४६ प्रतिशत विद्यार्थी उत्तीर्ण भएको शिक्षा विकास तथा समन्वय इकाइका प्रमुख तीर्थराज विश्वकर्माले जानकारी दिनुभएको छ । जिल्लामा यस वर्ष एसइइमा दिक्तेल बोर्डिङ स्कुलका छात्र अभय सिंहले ३.९५ जिपिए ल्याएर उत्कृष्ट भएका छन् । सोही विद्यालयका आयुस खनालले ३.९२ र रोजन थापाले ३.९१ जिपिए ल्याएका छन् ।
सामुदायिक विद्यालयतर्फ सरस्वती मावि दिक्तेलका दिपिका शाक्यले तीन दशमलव ८६, डेनिसा अधिकारीले तीन दशमलव ८२ र त्रिभुवन मावि एँेसेलुखर्ककी स्पन्दना राईले तीन दशमलव ८३ जिपिए ल्याएका छन् ।
