उपल्लो मुस्ताङको लोमान्थाङ गाउँपालिका–४, चुमजुङमा हिमचितुवाको आक्रमणबाट २१ भेडाच्यांग्रा मरेका छन् । आक्रमणमा परी सात भेडाच्यांग्रा घाइते छन् ।
अन्नपूर्ण संरक्षण क्षेत्र आयोजना (एक्याप)का अनुसार, लोमान्थाङ–४, न्याम्डोका स्थानीय पशुपालक किसान घ्याचो गुरुङको च्यांग्राखोरमा शनिबार (चैत २१) राति हिमचितुवाले पशुचौपायामाथि आक्रमण गरेको थियो । एक्याप प्रमुख उमेश पौडेलका अनुसार, चितुवाको आक्रमणबाट १० च्यांग्रा र ११ भेडा मरेका हुन् । खोरमा ३१५ भेडाच्यांग्रा थिए ।
हिमचितुवाको आक्रमणबाट भेडाच्यांग्रा मरेको सूचनापछि एक्याप लोमान्थाङका प्रतिनिधि, जिल्ला प्रहरी कार्यालय र लोमान्थाङ गाउँपालिकाका पशु प्राविधिकलगायत अधिकारीको टोली आइतबार (चैत २२) बिहान घटनास्थलमा पुगेको थियो । एक्याप लोमान्थाङका प्रमुख पौडेलका अनुसार, पीडित पशुपालकको च्यांग्राखोर ग्याबिन तारको घेराबारभित्र रहेको अवस्थामा हिमचितुवाले आक्रमण गरी क्षति पुर्याएको हो । हिमचितुवाको आक्रमणबाट प्रारम्भिक मूल्य मूल्यांकन गर्दा चार लाख ५५ हजार रुपैयाँ क्षति भएको जनाइएको छ ।
यसअघि, गएको फागुन ११ गते उपल्लो मुस्ताङको लोमान्थाङ–४, किम्लिङमा स्थानीय पशुपालक किसान मिङमर गुरुङको खोरमा हिमचितुवाले आक्रमण गर्दा नौ च्यांग्रा मरेका थिए । नौ च्यांग्रा घाइते भएका थिए ।
यस्तै, जिल्लाको तल्लो क्षेत्रस्थित घरपझोङ गाउँपालिका–२, मार्फामा हिमचितुवाले स्थानीय सन्तोष परियारको खोरमा दुईपटकसम्म आक्रमण गर्दा तीन दर्जन बढी च्यांग्रा मरेका थिए ।
पछिल्लो केही वर्षयता हिउँचितुवा मुख्य राजमार्ग सडक र बस्तीनजिक देखापर्न थालेको छ । (रासस)
