काठमाडौं ।प्रतिनिधिसभामा प्रतिनिधित्व गरेका राजनीतिक दलहरू संसदीय दलका नेता चयन गर्ने गृहकार्यमा जुटेका छन्। नयाँ सरकार गठनको तयारीसँगै दलभित्र नेतृत्व टुंग्याउने प्रक्रिया तीव्र बनेको हो।
झन्डै दुईतिहाइ बहुमतसहित पहिलो दल बनेको राष्ट्रिय स्वतन्त्र पार्टी (रास्वपा)ले वरिष्ठ नेता बालेन्द्र शाहलाई संसदीय दलको नेता चयन गर्दै प्रधानमन्त्रीका रूपमा अघि सार्ने तयारी गरेको छ। संविधानको धारा ७६ (१) अनुसार बहुमत प्राप्त दलका नेतालाई राष्ट्रपतिले प्रधानमन्त्री नियुक्त गर्ने व्यवस्था छ। सोहीअनुसार १३ चैतमा नयाँ प्रधानमन्त्रीको शपथ हुने तयारी छ।
रास्वपाले सांसदहरूको शपथ (१२ चैत) लगत्तै दलको नेता चयन गर्ने जनाएको छ। यसअघि पार्टीभित्रको छलफलमा निर्वाचित सांसदहरूको सहमतिमा नेता चयन गर्ने समझदारी बनेको छ।
दोस्रो ठूलो दल नेपाली कांग्रेसमा भने संसदीय दलको नेताबारे आन्तरिक छलफल जारी छ। अर्जुननरसिंह केसीले सार्वजनिक रूपमा दाबी गरेका छन् भने भीष्मराज आङ्देम्बेको नाम पनि चर्चामा छ। सभापति गगन थापाको राजीनामा विषय टुंगिएपछि मात्रै औपचारिक प्रक्रिया अघि बढ्ने नेताहरूले बताएका छन्।
नेकपा (एमाले)ले वरिष्ठतालाई आधार बनाएर नेता चयन गर्ने तयारी गरेको छ। उपाध्यक्ष रामबहादुर थापा प्रमुख दाबेदार मानिएका छन्। पद्मा अर्याल र सुहाङ नेम्वाङको नाम पनि चर्चामा रहेको छ।
१७ सिटसहित रहेको नेकपामा संयोजक पुष्पकमल दाहाल नै संसदीय दलको नेता बन्ने निश्चित भएको छ। पार्टीले प्रतिपक्षको प्रभावकारी भूमिका निर्वाह गर्न अनुभवी नेतृत्व आवश्यक भएको ठहर गरेको छ।
यसैबीच, श्रम संस्कृति पार्टीले अध्यक्ष हर्कराज राईलाई संसदीय दलको नेता बनाउने निर्णय गरेको छ। सात सिट रहेको उक्त पार्टीले संसद्मा सशक्त प्रतिपक्षी भूमिका खेल्ने जनाएको छ।
पाँच सिट रहेको राष्ट्रिय प्रजातन्त्र पार्टी (राप्रपा)ले ज्ञानेन्द्र शाहीलाई संसदीय दलको नेता र खुस्बु ओलीलाई प्रमुख सचेतक बनाइसकेको छ।
प्रतिनिधिसभाका २७५ सिटमध्ये रास्वपाले १८२ सिट जितेको छ। नयाँ सरकार गठनका लागि आवश्यक प्रक्रिया अन्तिम चरणमा पुगेको छ।
