काठमाडौं । पूर्वराजा ज्ञानेन्द्र शाह झापाको चार महिना लामो बसाई पछि शुक्रबा काठमाडौँ फर्किएका छन् । उनलाई त्रिभुवन अन्तर्राष्ट्रिय विमानस्थलमा राजावादी तथा राष्ट्रवादी समर्थकहरूले भव्य रूपमा स्वागत गरेका छन् ।
समर्थकहरूले विमानस्थलको मुख्य गेट बाहिर ठूलो भीड जम्मा गरी ‘राजा आऊ, देश बचाऊ’ जस्ता नारा लगाएका थिए । राप्रपालगायतका राजावादी समूहहरूले उनलाई फूलमाला र अबिर लगाएर अभिनन्दन गरे । पूर्वराजा ज्ञानेन्द्रले गाडीमा उभिएरै आफ्ना समर्थकहरूको अभिवादन स्वीकार गरेका थिए र त्यहाँबाट ¥यालीसहित उनी निर्मल निवासतर्फ प्रस्थान गरे ।
पूर्वराजाको आगमनलाई ध्यानमा राख्दै प्रशासनले विमानस्थल आसपासको क्षेत्रमा निषेधाज्ञा जारी गरी सुरक्षा व्यवस्था निकै कडा पारेको थियो । विमानस्थलदेखि निर्मल निवाससम्मको रुटमा डीएसपीहरूको कमान्डमा ठूलो स)ख्यामा प्रहरी परिचालन गरिएको थियो । सुरक्षाको कडा घेरा भए तापनि समर्थकहरूको उपस्थितिले विमानस्थल क्षेत्र निकै चर्चामा रह्यो । त्यसमा पनि दुर्गा प्रसाईले सयौं समर्थक लगेपछि माहोल फरक बनेको थियो ।
सामाजिक सञ्जालमा अहिले पूर्वराजाको स्वागतमा उर्लिएको भिडलाई लिएर राप्रपा दंग देखिएको छ । चुनावको मुखमा राजसंस्थाको समर्थक बढेको भन्दै अब राजसंस्था पुनःस्थापनाको एजेन्डालाई राप्रपाले अझै सशक्त बढाउने त्यो पार्टीका नेताहरूले लेखेका र गरेका टिप्पणीले प्रस्ट पार्छ । त्यति मात्र होइन, शुक्रबार हजारौं भिड एकत्रित गर्नुमा दुर्गा प्रसाईको हात देखिएको बुझाई राप्रपाको रहेको छ । त्यसैले कतै राप्रपाले प्रसाईलाई चुनावको स्टार प्रचारक बनाउने त होइन भन्ने अनुमान पनि गर्न थालिएको छ ।
पछिल्लो समय चुनावी प्रचारका क्रममा भिड कि रास्वपा नेता बालेन्द्र साह बालेन, रवि लामिछाने वा कांग्रेस सभापति गगन थापा उपस्थित कार्यक्रममा मात्र देखिएको छ । शुक्रबार प्रसाईले पनि पूर्वराजाको समर्थनमा भिड उतारेपछि राप्रपामा प्रसाईलाई चुनावी प्रचारक बनाउनुपर्ने मत उठ्ने संकेत देखिएको हो । किनभने चुनाव भनेको लहर पनि हो । अहिले राप्रपाले बोलेका र आयोजना गरेको कार्यक्रममा कहीँकतै कुनै रौनक देखिएको छैन । त्यसैले रवीन्द्र मिश्रले भनेझैं राजसंस्था पुनःस्थापनाको बटमलाइन लिएर राप्रपा जाने त होइन भन्ने प्रश्न उब्जेको छ ।
