काठमाडौं । काठमाडौँ महानगरपालिकाभित्र सञ्चालनमा रहेका दुई डेन्टल क्लिनिकलाई तत्काल बन्द गरी सिल गर्न नेपाल मेडिकल काउन्सिलले सिफारिस गरेको छ। अनुगमनका क्रममा गैरचिकित्सकबाट उपचार गरिएको र आधारभूत मापदण्डसमेत पूरा नगरेको भेटिएपछि यस्तो निर्णय गरिएको हो।
काउन्सिलका अनुसार पूजा डेन्टल क्लिनिक र नाइस स्माइल डेन्टल केयर प्रा।लि।मा योग्य दन्त चिकित्सक र डेन्टल हाइजिनिस्टबिना सेवा सञ्चालन गरिएको पाइएको छ। सर्वसाधारणबाट गुनासो आएपछि बिहीबार चार क्लिनिकमा अनुगमन गरिएको थियो, जसमध्ये दुईवटा गम्भीर लापरबाहीमा संलग्न देखिएका हुन्।
काउन्सिल सदस्य डा. भुमेश काफ्लेका अनुसार ती क्लिनिकहरू सम्बन्धित निकायमा दर्ता नभएको, उपकरणहरूको स्टेरिलाइजेसन नगरेको, अत्यधिक फोहोर तथा अस्वस्थ वातावरणमा उपचार गरिएको पाइएको छ। साथै बिरामीको अभिलेख नराखिएको र बिग्रिएको एक्स–रे मेसिन प्रयोगका लागि राखिएको अवस्थासमेत फेला परेको जनाइएको छ।
अनुगमनका क्रममा आरुबारी डेन्टल क्लिनिक जनस्वास्थ्य कार्यालयमा दर्ता नभएको तथा सम्बन्धित चिकित्सकसँग औपचारिक सम्झौता नभएको भेटिएको छ। नागेश्वर डेन्टल होममा भने पूर्णकालीन दन्त चिकित्सक नराखी अंशकालीन चिकित्सकमार्फत सेवा सञ्चालन गरिएको पाइएको काउन्सिलले जनाएको छ।
काउन्सिलले यस्ता गतिविधिले सर्वसाधारणको मुख तथा दन्त स्वास्थ्यमा प्रत्यक्ष जोखिम निम्त्याउने भन्दै सम्बन्धित निकायलाई आवश्यक कारबाही गर्न पत्र पठाएको छ। अनुगमन टोलीमा डा. अजय कुमार शाह, डा. अस्मिता पोखरेल, डा. भुमेश काफ्ले, डा. हरी वली र रमिला मानन्धर सहभागी थिए।
