मुस्ताङ, २४ माघः मुस्ताङमा आयोजित पाँचौँ राष्ट्रिय स्की प्रतियोगिता आज सम्पन्न भएको छ । नेपाल स्की सङ्घको आयोजनामा आज सम्पन्न अल्पाइन स्कीअन्तर्गत पुरुषतर्फको सिनियर स्की प्रतियोगितामा रसुवाका छेवाङ मिङ्गुर तामाङ र जुनियर अल्पाइन स्की प्रतियोगितातर्फ दोलखाका साम्देनगेल्बु शर्मा च्याम्पियन बनेका छन् ।
यसैगरी महिलातर्फको अल्पाइन स्की प्रतियोगिताअन्तर्गत नुवाकोटकी सङ्गीता लामा र महिला जुनियर अल्पाइन स्कीतर्फ काठमाडौँकी नैना शाक्य च्याम्पियन बनेकी नेपाल स्की सङ्घले जनाएको छ ।
यसैगरी सिनियर अल्पाइन स्की प्रतियोगितामा काठमाडौँका समिप लामिछाने दोस्रो हुँदा दोलखाका पुण्डरिक पाण्डे तेस्रो भएका छन् । पुरुष जुनियर स्कीतर्फ भक्तपुरका अर्थसिंह बोहरा दोस्रो भए भने मुस्ताङका केसाङ गुरुङले तेस्रो भएका छन् ।
महिला अल्पाइन स्कीतर्फ काठमाडौँका आयुशी महर्जन दोस्रो हुँदा महिला जुनियर स्कीतर्फ महोत्तरीका मेन्काकुमारी आले दोस्रो भएकी छिन् । त्यस्तै काठमाडौँकी आशिया तामाङ तेस्रो भएकी हुन् । प्रतियोगिताको पुरुष र महिला सिनियर÷जुनियर च्याम्पियन बनेका स्की खेलाडीले स्वर्ण पदक पाएका छन् । पुरुष र महिलातर्फ दोस्रो स्थान हासिल गरेका स्की खेलाडीले रजत र तेस्रो स्थान हासिल गरेका खेलाडीले कास्य पदक प्राप्त गरेका छन् ।
प्रतियोगिताअन्तर्गत पुरुष र महिलातर्फको सिनियर र जुनिएर विजेता खेलाडीले नेपाल स्की सङ्घका अध्यक्ष जीवनराम श्रेष्ठ, महासचिव विजय श्रेष्ठ र मुस्ताङ स्की सङ्घका अध्यक्ष सुरज गुरुङलगायत नेपाल स्की सङ्घका पदाधिकारी तथा सदस्यले पदक तथा प्रमाणपत्र प्रदान गर्नुभयो । पाँचौँ राष्ट्रिय स्की प्रतियोगितामा सहभागी खेलाडी तथा कोचलाई नेपाल स्की सङ्घले प्रमाणपत्र प्रदान गरेको थियो ।
नेपाल स्की सङ्घका अनुसार यहाँको वारागुङ मुक्तिक्षेत्र–४ मुक्तिनाथ क्षेत्रमा आयोजित पाँचाँै संस्करणमा जुनियर खेलाडी १५ र सिनियर खेलाडी १० जनाको सहभागिता थियो ।
दुई वर्षपछि आयोजना भएको प्रतियोगिता सञ्चालनका लागि काठमाडौँबाट खेलाडी र अफिसियल टोली गरी ५० भन्दा बढी बुधबार मुस्ताङ आइपुगेका थिए । पाँचौँ राष्ट्रिय स्की प्रतियोगिताका लागि सङ्घले दुई दिनसम्म यहाँ खेलाडीलाई अभ्यास प्रशिक्षण तालिम दिएको थियो ।
तालिम प्रशिक्षणका लागि मुख्य प्रशिक्षकका रूपमा स्वराज श्रेष्ठसहित प्रशिक्षक दिनेश बोहरा, समिप लामिछाने, लक्ष्मी राई, आयुसी महर्जन र शारीरिक प्रशिक्षकका रूपमा बिमन्थ अधिकारी खटिएका थिए । सङ्घले योसँगै मुस्ताङमा लगातार चौथो पटक स्की प्रतियोगिता आयोजना गरेको हो । सङ्घले पहिलो स्की प्रतियोगिता २०१६ मा रसुवाको क्यान्जेन भ्यालीमा सुरु गरेको थियो ।
मुक्तिनाथस्थित सेताम्मे भिरालो हिउँले भरिएको पाखोमा स्की प्रतियोगिता आयोजना भएको मुस्ताङ स्की सङ्घका अध्यक्ष गुरुङले जानकारी दिनुभयो । हिउँले भरिएको करिब २०० मिटर दूरीमा दुईवटा मोड राखेर स्की प्रतियोगिता सञ्चालन गरिएको थियो ।
यसपटक स्की खेलको विकास र प्रवर्द्धन गर्दै नेपाली खेलाडीलाई राष्ट्रिय तथा अन्तरराष्ट्रिय स्की प्रतियोगितामा भाग लिन सकून् भन्ने उद्देश्यले १८ वर्षमुनिका जुनियर खेलाडीलाई पनि सहभागी गराइएको नेपाल स्की सङ्घले जनाएको छ ।
प्रतियोगिताको समापनमा सङ्घका अध्यक्ष श्रेष्ठले सङ्घले यातायातको सहजताका कारण पछिल्लो चार संस्करण मुस्ताङमा स्की प्रतियोगिता आयोजना गरेको बताउनुभयो । स्की खेललाई राज्यले उपेक्षा गरेको उल्लेख गर्दै उहाँले अब यस प्रकारका हिउँमा खेलिने साहसिक खेलको प्रवर्द्धन गर्न स्थानीयस्तरको प्रयाससँगै राज्यका तीन तहका सरकारले ध्यान दिनुपर्नेमा जोड दिनुभयो ।
स्की सङ्घ मुस्ताङका अध्यक्ष गुरुङले हिउँमा खेलिने यस प्रकारको प्रतियोगिताले पर्यटन प्रवर्द्धनमा योगदान पु¥याउने विश्वास व्यक्त गर्नुभयो । यसले यहाँका व्यवसायलाई बेमोसमी घाटा कम गर्न सहयोग गर्ने उहाँले बताउनुभयो ।
सेताम्मे हिउँमा खुट्टामा लगाउने प्लेट बोर्ड जडान गरी चस्मा, लौरी, हेलिमेट लगायतका उपकरण लगाएर हिउँमा चिप्लेटी खेल्ने खेललाई स्की प्रतियोगिता भनिन्छ । मुस्ताङमा आयोजित स्की प्रतियोगितामा सहभागी खेलाडीहरु हिउँमा साहसिक खेल खेल्न पाउँदा गौरान्वित भएको बताएका छन् ।
