काठमाडौं : हिमाली जिल्ला मुस्ताङको मनमोहक प्राकृतिक सौन्दर्यलाई पर्दामा उतारिएको म्युजिक भिडियो ‘मुटु भित्र धड्कन’ हिजो (माघ २३, शुक्रबार) सार्वजनिक गरिएको छ। कलाकार तथा निर्माता कृष्ण सुनार र जुना कार्कीको अभिनय रहेको उक्त भिडियो युट्युब, फेसबुक र टिकटकसहित विभिन्न सामाजिक सञ्जालमार्फत दर्शकमाझ ल्याइएको हो।
निर्देशक कविराजको निर्देशनमा तयार भएको भिडियोको छायाङ्कन मुस्ताङ, कागबेनीलगायत क्षेत्रमा दुई दिनसम्म गरिएको हो। निर्माताका अनुसार भिडियो निर्माणमा करिब पाँच लाख रुपैयाँ खर्च भएको छ। प्रेमभाव झल्किने गीतमा प्रमोद खरेल र जिना रसाइलीको स्वर रहेको छ। गीतमा लेखु सहयात्रीका शब्द, अर्जुन पोखरेलको संगीत तथा गोपाल रसाइलीको एरेन्जमेन्ट रहेको छ। मिक्सिङ तथा मास्टरिङ किशोर थापाले गरेका हुन् भने रेकर्डिङ ए–वन म्युजिसियन स्टुडियोमा गरिएको हो।
पहिले सहरका अग्ला भवन र स्टुडियो केन्द्रित भिडियो बन्ने प्रवृत्तिबाट फरक ढंगले यसपटक हिमाली भेगको मौलिक सौन्दर्यलाई समेटिएको निर्माता कृष्ण सुनार बताउँछन्। “हिमालको हिउँ, प्रकृति र त्यहाँको मोहमाया दर्शकले प्रत्यक्ष अनुभूति गर्न सकून् भन्ने चाहना हो,” उनले भने।
बाल्यकालदेखि नै अभिनयप्रतिको मोह बोकेका सुनारको फिल्ममा नायक बन्ने सपना अनेक उतार–चढावबीच पनि जीवित रह्यो। अवसर र संघर्षका कारण उनी केही समय नेपाल बाहिरिन बाध्य भए र हाल अमेरिकामा बसोबास गर्दै कर्मा कन्स्ट्रक्सन सञ्चालन गर्दै आएका छन्। यद्यपि, उनी भन्छन्—उनी जहाँ रहे पनि उनको मन र धड्कन नेपालमै छ। नेपाली माटो, संस्कृति र नेपाली जनताप्रतिको प्रेमकै कारण उनी नियमित रूपमा नेपाल आइरहन्छन्। पोखरा–लेखनाथ जन्मभूमि भएका सुनार विगत १४ वर्षदेखि हरेक वर्ष करिब तीन महिना नेपालमै बिताउँदै गीत–संगीत र म्युजिक भिडियो निर्माणमा सक्रिय रहँदै आएका छन्। तीन दशकभन्दा बढी समयदेखि कलाकारितामा संलग्न उनले हालसम्म १४ वटा म्युजिक भिडियो निर्माण गरिसकेका छन् र ठूलो पर्दाको फिल्म निर्माण गर्ने सपना अझै कायम रहेको बताएका छन्।
भिडियो निर्माणमा प्रोडक्सन डिजाइनर गणेश सापकोटा, मेकअप आर्टिस्ट सरोज बुढाथोकी, छायाङ्कन निर्देशक दुर्गा पौडेल, सम्पादक मनोज कार्की तथा कलरिस्ट रेनिश फागोको महत्वपूर्ण योगदान रहेको छ। भिडियोको पोस्ट–प्रोडक्सन लुमिनोस पोस्टवर्क्समा सम्पन्न गरिएको हो। निर्देशक घत्राज स्वयंले भिडियोको कोरियोग्राफी समेत गरेका छन्।
