बागमती।आगामी फागुन २१ गते हुने प्रतिनिधिसभाको निर्वाचनको मिति नजिकिँदै जाँदा मकवानपुर क्षेत्र नम्बर १ मा चुनावी माहोल तीव्र बन्दै गएको छ । पटकपटक चुनावी प्रतिस्पर्धा गरेका पुरानो अनुभवी नेतासँगै नयाँ युवा पुस्ताका उम्मेदवारहरू चुनावी प्रतिस्पर्धामा उत्रिएपछि यस क्षेत्रको चुनावी माहोल रोचक बनेको छ । यस क्षेत्रमा विभिन्न राजनीतिक दलका १३ र स्वतन्त्र १० गरी २३ जना उम्मेदवारहरू चुनावी प्रतिस्पर्धामा छन् ।
यो क्षेत्रमा नेपाली कांग्रेसबाट महालक्ष्मी उपाध्यय (डिना), नेपाल कम्युनिष्ट पार्टी (एमाले) बाट रामेश्वर राना, नेपाली कम्युनिष्ट पार्टीबाट विजय गौतम, राष्ट्रिय प्रजातन्त्र पार्टीबाट दीपकबहादुर सिंह, राष्ट्रिय स्वतन्त्र पार्टीबाट प्रकाश गौतम, प्रगतिशील लोकतान्त्रिक पार्टीबाट तेजप्रसाद उप्रेती, श्रम संस्कृति पार्टीबाट विद्या श्रेष्ठ महर्जन, उज्यालो नेपाल पार्टीबाट सुरेन्द्र लामा चुनावी मैदान छन् ।
नेपाल मजदुर किसान पार्टीबाट रञ्जना सुवाल, नेपाल कम्युनिष्ट पार्टी (माओवादी) बाट महेश नेपाली, जनता समाजवादी पार्टी नेपालबाट रूपक लामा, जनता समाजवादी पार्टीबाट दीपक सिंतान र मङ्गोल नेशनल अर्गनाइजेशनबाट युवराज लामा चुनावी प्रतिस्पर्धामा छन् । स्वतन्त्र रूपमा राकेशकुमार शर्मा, अमिक परियार, राजाराम बोगटी, मठु पुलामीमगर, अमर दङ्गाल, टीकाप्रसाद चौलागाईं, सुशीला सुवेदी, ज्ञान सागर लामा र राजकुमार खड्का चुनावी प्रतिस्पर्धामा छन् ।
यीमध्ये केही पुराना र लामो राजनीतिक अनुभव भएका पाका उम्मेदरवार छन् भने केही नयाँ युवा उमेरका उम्मेदवार छन् । उम्मेदवारहरूमध्ये कांग्रेसका उपाध्याय र राप्रपाका सिंह पाँचौँ पटक चुनावी प्रतिस्पर्धामा उत्रेका हुन् । मकवानपुर क्षेत्र नम्बर १ मा पर्ने हेटौँडा उपमहानगरपालिकाको नगरप्रमुख पदका लागि २०७४ र २०७९ को निर्वाचनमा प्रतिस्पर्धा गरेका राप्रपाका सिंह अघिल्लो २०७९ को निर्वाचनमा यही क्षेत्रबाट प्रतिनिधिसभा सदस्यमा निर्वाचित हुनुभएको थियो । कांग्रेसका उपाध्याय प्रतिनिधिसभा भने प्रतिनिधिसभा सदस्यको निर्वाचनमा प्रतिस्पर्धा गर्दै आएपनि हालसम्म सफल हुन सक्नुभएको छैन ।
एमालेका राना, नेकपाका विजय गौतम र रास्वपाका प्रकाश गौतम पहिलो पटक प्रतिनिधिसभा सदस्य निर्वाचनका लागि उम्मेदवार बनेका हुन् । तत्कालीन जिल्ला विकास समिति मकवानपुरका सभापति भइसक्नुभएका एमालेका राना पाका उमेरका अनुभवी नेताको रूपमा चिनिनुुहुन्छ । उम्मेदवारी दर्ता गराएसँगै यति बेला उम्मेदवारहरू आफ्ना एजेण्डा बोकेर मतदाताको घरदैलोमा पुग्न थालेका छन् । यो क्षेत्रमा हेटौँडा उपमहानगरपालिकाको १५ वटा वडा, मकवानपुरगढी गाउँपालिका चार वटा वडा, बागमती गाउँपालिका र बकैया गाउँपालिका पर्छन् ।
मकवानपुर क्षेत्र नम्बर १ मा ७९ हजार ६२१ पुरुष र ७८ हजार ८१० महिला गरी एक लाख ५८ हजार ४३५ मतदाता छन् । यस क्षेत्रमा ग्रामीण भेगभन्दा सहरी क्षेत्र बढी पर्छन् । पार्टीको सङ्गठित मत कम भए पनि अघिल्लो प्रतिनिधिसभा निर्वाचनमा राप्रपाका सिंह निर्वाचित हुनुभएको थियो । अघिल्लो विसं २०७९ को प्रतिनिधिसभा निर्वाचनमा राप्रपाका सिंहले २७ हजार ८१६ मत प्राप्त गरी विजयी हुँदा कांग्रेसका उपाध्यायले २५ हजार ४३४ मत प्राप्त गर्नुभएको थियो भने एमालेको सूर्य चुनाव चिह्नबाट चुनाव लड्नुभएका तत्कालीन राप्रपा नेपालका कमल थापाले २५ हजार ४२० मत प्राप्त गर्नुभएको थियो ।
गत २०७४ र २०७९ को निर्वाचनमा सो क्षेत्रमा गठबन्धन गरेका कारण तत्कालीन नेकपा (माओवादी केन्द्र) को आफ्नो उम्मेदवार थिएनन् । तर पहिलो संविधानसभा निर्वाचनमा सो क्षेत्रबाट तत्कालीन नेकपा (माओवादी केन्द्र) का प्रेमबहादुर पुलामी (छिन्तु) र दोस्रो संविधानसभामा नेकपा (माओवादी केन्द्र) का प्रल्हाद लामिछानेले जित्नुभएको थियो । त्यसयता माओवादीले प्रतिनिधिसभामा यो क्षेत्रबाट जित्न सकेको छैन ।
कम्युनिष्ट पार्टीको गढ मानिने मकवानपुर क्षेत्र नम्बर १ मा पहिलो पटक अघिल्लो २०७९ को निर्वाचनमा गैरकम्युनिष्टले जितेको इतिहास छ । कांग्रेसले यो क्षेत्रबाट प्रतिनिधिसभा निर्वाचनमा विजयी हुन सकेको छैन । यसपटक फरक परिस्थिति र समयमा प्रतिनिधिसभा निर्वाचन हुन लागेकाले चुनाव आफूले जित्ने उम्मेदवारहरूले दाबी गर्दै आएका छन् ।
राप्रपाका उम्मेदवार सिंहले आफू तीन वर्षको छोटो कार्यकालमा हेटौँडा–काठमाडौँ जोड्ने कान्तिलोकपथ सडक विस्तार तथा दुवै साइडमा नाला निर्माणका साथै जिल्लाका शैक्षिक विकाका लागि थुप्रै योजना अघि बढाएकोले ती अधुरा योजनालाई पूरा गर्न मतदाताले यस पटक आफूलाई विजयी बनाउने दाबी गर्नुहुन्छ । ‘‘म जितेर गएपछि हेटौँडामा क्षेत्रको विकासका लागि थुप्रै योजना ल्याए, ती योजना सञ्चालनमा छ”, सिंहले भन्नुभयो, ‘‘ती अधुरा योजना पूरा गर्न फेरि जनताले जिताउने छ, भन्नेमा म विश्वस्त छु ।” जितेर गएपछि यहाँको विकास र मतदाताकै बीचमा रहेर काम गरेकाले आफू जित्ने ढुक्क रहेको उहाँको भनाइ छ । आफ्नो एजेण्डा हिन्दू राज्य र सनातन धर्मको संरक्षण रहेको उहाँ बताउनुहुन्छ ।
नेपाली कांग्रेसका उम्मेदवार उपाध्यायले आफू यसै क्षेत्रमा जन्मेको र निरन्तर यहाँको जनतासँग बसेर राजनीति र सामाजिक कार्य गर्दै आएकाले जित्ने दाबी गर्नुहुन्छ । ‘‘म पटक चुनाव हारे पनि निरन्तर यहाँका जनताको बीचमा रहेर दुःख र सुखमा काम गरेकी छु”, उपाध्यायले भन्नुभयो, ‘‘आफू नजिते पनि जनताका लागि काम गरेकी छु, अझ अधुरा रहेका कतिपय काम पूरा गर्नका लागि आफूलाई मतदाताले जिताउने छ ।”
विगतको निर्वाचनभन्दा यसपटक पार्टीको आन्तरिक समस्या हल भई पार्टीका नेता कार्यकर्ताहरू एकताबद्ध भएर अघि बढेकाले चुनाव जित्ने बलियो आधार बनेको उहाँको कथन छ । हेटौँडा औद्योगिक क्षेत्रको अवस्थामा सुधार गर्दै हेटौँडालाई औद्योगिक हबको रूपमा विकास गर्ने आफ्नो प्रमुख एजेण्डा भएको उपाध्याय बताउनुहुन्छ । आफू तत्कालीन जिल्ला विकास समिति मकवानपुरको सभापति भएका बेला जिल्लालाई समृद्ध बनाउन उद्योग र यातायातको क्षेत्रमा काम गरेकाले मतदाता विश्वास गरी मत दिने दाबी गर्नुहुन्छ ।
‘‘म जिल्ला विकासको सभापति हुँदा मैले इमान्दारितापूर्वक गरेको काम यहाँका जनताले देखेका छन्, त्यसैले यस पटक मतदाताले मलाई भोट दिन्छ”, नेकपा (एमाले) का उम्मेदवार राना भन्नुहुन्छ, ‘‘पार्टीको मजबुत सङ्गठन, अघिल्लो निर्वाचनमा पार्टीको मत परिणामबाट म चुनाव जित्छु ।” मुलुकको स्वाधिनता, भौगोलिक अखण्डता र लोकतन्त्रको रक्षाका लागि एमालेले जित्नुपर्ने उहाँको भनाइ छ । यो क्षेत्रमा पार्टीको सङ्गठित आधार बलियो भएको र अहिलेको अवस्थामा मतदाताले नयाँ अनुहार, युवा अनुहार खोजिरहेकोले यसपटक आफूले जित्ने नेपाली कम्युनिष्ट पार्टीका उम्मेदवार विजय गौतम बताउनुहुन्छ ।
‘‘सुशासन, समृद्धि नै मेरो एजेण्डा हो, जेनजी आन्दोलनले उठाएको एजेण्डा पनि यही नै हो”, विजय गौतमले भन्नुभयो, ‘‘अहिले सुशासन, समृद्धि, जनमुखी नीति र स्थानीय विकासका ऐजण्डा बोकेर मतदाताहरूको बीचमा पुगिरहेको छु, मतदाता आकर्षण बढेको छ, त्यसैले मत जित्छु ।” विगतमा आफ्नो पार्टीले यो क्षेत्रबाट जितेर राम्रो काम गरेकाले आफ्नो पार्टीप्रति मतदाताको भरोसा बढेको उहाँको जिकिर छ ।
उम्मेदवारहरूले आफ्नो जित सुनिश्चित रहेको दाबी गरिहँदा मतदाताहरू भने कृषि र उद्योगमा लगानीको वातावरण बनाउँदै रोजगारीको सृजना गर्नेतर्फ ध्यान दिनुपर्नेमा जोड दिएका छन् ।
