काठमाडौं । आन्दोलनपछिको राजनीतिक भूमिकालाई थप संस्थागत बनाउने प्रयासस्वरूप नेपाल जेन(जी) फ्रन्टले १३ सदस्यीय सल्लाहकार परिषद् गठन गरेको छ। आइतबार जारी विज्ञप्तिमार्फत फ्रन्टले विभिन्न क्षेत्रका अनुभवी तथा परिवर्तनकारी व्यक्तित्वलाई समेट्दै नयाँ संरचना सार्वजनिक गरेको हो।
नवगठित परिषद्मा विवेकशील साझा पार्टीका पूर्व अध्यक्ष मिलन पाण्डेसहित डा। रामजी राम, आशुतोष तिवारी र प्रगति राईलगायत व्यक्तिहरू समावेश छन्। परिषद्का अन्य सदस्यमा साधना राई, डा। मीना पौडेल, रमेश पौड्याल, प्रमेश श्रेष्ठ, दिव्येश गिरि, सस्मित पोखरेल, सरोज गौतम, नवीन प्राचीन र अनन्त अर्याल रहेका छन्।
फ्रन्टका अनुसार सरकारसँग आन्दोलनपछि भएको सम्झौताको कार्यान्वयन सुनिश्चित गर्न र राजनीतिक प्रक्रियालाई सही दिशामा लैजान सल्लाहकार परिषद् गठन गरिएको हो। संगठनले लोकतान्त्रिक र शान्तिपूर्ण संक्रमणका लागि जेन(जी) र सरकारबीच भएको सहमतिलाई पूर्ण रूपमा लागू गर्नु अपरिहार्य रहेको जनाएको छ। साथै, प्रतिनिधि सभाको निर्वाचन समयमै हुनुपर्नेमा पनि फ्रन्टले जोड दिएको छ।
अन्तरिम नागरिक सरकारलाई सम्झौता कार्यान्वयनप्रति सजग गराउँदै फ्रन्टले आगामी जननिर्वाचित संसद् र सरकारले समेत जेन(जी) विद्रोहको मर्म आत्मसात् गर्ने अपेक्षा व्यक्त गरेको छ। यही उद्देश्यका साथ बहुपक्षीय संवाद, जनजागरण तथा राजनीतिक दबाबका कार्यक्रमलाई निरन्तरता दिइरहेको फ्रन्टको भनाइ छ।
अनुभवी र परिवर्तनमुखी अग्रजहरूलाई सल्लाहकारको रूपमा जोडेर आफ्नो आन्दोलनलाई अझ व्यवस्थित, प्रभावकारी र दिगो बनाउने रणनीतिमा फ्रन्ट अघि बढेको देखिन्छ। नयाँ परिषद् गठनसँगै जेन९जी फ्रन्टको भूमिका आन्दोलनबाट नीतिगत हस्तक्षेपतर्फ विस्तार हुने संकेत गरेको छ।
