काठमाडौँ– नेपाली कांग्रेसका सांसद प्रदीप पौडेलले गंगालाल अस्पताललाई एकेडेमीको रूपमा विकास गर्न माग गरेका छन् ।
आइतबार सहिद गंगालाल राष्ट्रिय हृदय केन्द्रको २७औँ वार्षिकोत्सव समारोहलाई सम्बोधन गर्दै उनले यस्तो बताएका हुन् ।
सबै अस्पताललाई सेवा प्रदान गर्न सक्ने क्षमताको रूपमा विकास गर्न जरुरी रहेको उनको भनाइ थियो । सांसद पौडेलले मुटु रोगको उपचार गर्ने जनशक्ति उत्पादन गरी रोगसम्बन्धी अनुसन्धान गर्न आवश्यक रहेको बताए ।
गंगालाल अस्पताललाई प्रतिष्ठान बनाउनु देशको आवश्यकता रहेको बताउँदै उनले यसलाई राष्ट्रिय गौरवको आयोजनाका रूपमा अघि बढाई दक्षिण एसियाको उत्कृष्ट अस्पतालको रूपमा विकास गर्न जरुरी रहेको बताए ।
उनले अब पनि औपचारिकतामा मात्रै सीमित रहेर देशको विकास हुन सम्भव नरहेको जिकिर गरे ।
‘अब औपचारिकतामा नै सीमित रहेर परिवर्तन गर्न सकिँदैन । आक्रामक ढंगबाट परिवर्तन गर्नुपर्ने स्थिति छ । नागरिकता दिनु मात्रै राज्यको दायित्व होइन, हरेक नागरिकलाई पीडामा, दुःखमा, समस्यामा साथ दिनुपर्छ,’ उनले भने ।
सांसद पौडेलले सरकारी कार्यलयहरूमा काम गर्नेहरूको सुविधाका बारेमा राज्यले पुनर्विचार गर्नुपर्ने पनि बताए ।
