काठमाडौं– जेनजी आन्दोलनका क्रममा भदौ २४ गते नख्खु कारागारबाट कागज देखाएर बाहिर निस्किएका राष्ट्रिय स्वतन्त्र पार्टी (रास्वपा)का सभापति रवि लामिछाने प्रकरणमा नयाँ खुलासा भएको छ।
उच्चस्तरीय जाँचबुझ आयोगले उक्त प्रकरणमा बुझ्ने क्रममा जेलर सत्यराज जोशीसँग सोमबार लिएको बयानले नयाँ खुलासा भएको हो। जोशीले आयोगसमक्ष लामिछाने जेलबाट निस्किएको डेढ घन्टापछि आफूलाई रास्वपाका नेताले पत्रमा जबरजस्ती हस्ताक्षर गराएको बयान दिएको सतहमा आएको हो।
लामिछाने निस्किएको विषयमा भदौ २४ गतेदेखि विवाद सुरु भएको थियो। जेनजी पुस्ताका आन्दोलनकारीले नै त्यसको बिरोध गरेपछि उक्त राती मात्र लामिछानेले पत्र सार्वजनिक गरेका थिए।
आयोगलाई जोशीले दिएको बयानअनुसार रास्वपाका नेताहरुले हस्ताक्षर गर्न भनेपछि नगरी नभएको अवस्था थियो।
लामिछाने जेनजी आन्दोलनपछि प्रधानमन्त्री बन्ने लहडमा बाहिर निस्किएको विषय यसअघि नै सतहमा आएको थियो। सार्वजनिक गरिएको पत्रमा मिति पनि केरमेट देखिएपछि विवाद भएको थियो।
लामिछानेलाई निकाल्नका लागि उपसभापति डीपी अर्याल, प्रवक्ता मनिष झालगायत पुगेका थिए। जेलमा आगजनी भएको क्रममा झाको उपस्थिति देखिएको भिडिओ सार्वजनिक भएपछि उनले त्यसको प्रष्टीकरण समेत दिएका थिए।
जोशीको यो बयानसँगै यस प्रकरणमा थप बयान लिने क्रम जारी छ। पत्रमा हस्ताक्षर गराउनका लागि तत्कालिन गृहसचिव गोकर्णमणि दुवाडीको पनि दबाब रहेको भन्ने चर्चाबीच आयोगले थप बयान लिने तयारी गरेको छ।
