मुस्ताङ। अचेल मुस्ताङको मार्फा गाउँ पर्यटकको मुख्य आकर्षण बनेको छ। दुई वर्षअघि सुनसान जस्तो देखिने मार्फामा अहिले गल्लीभित्र पर्यटकको चहलपहल देखिन्छ। मुक्तिनाथ दर्शनपछि पर्यटकहरू मार्फाको सांस्कृतिक र प्राकृतिक सौन्दर्यता अवलोकन गर्न यहाँ रोक्ने गरेका छन्।
मार्फा गाउँको गल्लीभित्र सदिंयौ वर्ष पुराना ढुङ्गा र माटोले निर्मित घरहरू, परम्परागत सांस्कृतिक मौलिकता, स्याउबगैंचा र भूमिगत बिजुली प्रणालीले पर्यटकको ध्यान तानिरहेको छ। दसैँ, तिहार र छठजस्ता पर्वमा दैनिक करिब रु १५ लाखसम्मको आर्थिक कारोबार हुने गरेको स्थानीयबासी आइतप्रसाद हिराचनले जानकारी दिए।
हाल, सडक पहुँच सहज भएपछि मार्फा भित्रका पर्यटक लक्षित होटल, स्याउ बगैंचा अवलोकन र आधुनिक पर्यटन सुविधासमेत सञ्चालनमा आएका छन्। गाउँपालिकाले पुराना घर संरक्षण गर्न नियम बनाएको छ।
पर्यटकहरू, विद्यार्थीहरू र चलचित्र छायाङ्कन टोलीले मार्फाको मौलिक संस्कृति, गल्लीभित्रको जीवनशैली र प्राकृतिक सौन्दर्यको अनुभव गर्दै टिकटक र फोटो बनाइरहेका छन्। स्याउबगैंचा, ध्योलिङ बुद्धिस गुम्बा, डिस्टिलरी र शीतोष्ण बागवानी विकास केन्द्रले मार्फालाई कृषिसँगै पर्यटनको गन्तव्यका रुपमा स्थापित गरेको छ।
