काठमाडौं । नेकपा माओवादी केन्द्रको स्थायी समिति बैठकले राष्ट्रपतिको चयनमा राष्ट्रिय सहमति खोज्ने निर्णय गरेको छ ।
शुक्रबार पार्टी कार्यालय पेरिसडाँडामा बसेको बैठकले सो निर्णय गरेको हो । एमालेसहितका दलहरूसँग बसेर राष्ट्रपति चयनका लागि राष्ट्रिय सहमति खोज्न पहल गर्ने निर्णय गरिएको पार्टीका उपाध्यक्ष कृष्णबहादुर महराले जानकारी दिए । बैठकमा धेरैजसो नेताहरूले राष्ट्रिय सहमतिमै राष्ट्रपति चयन गर्नुपर्ने धारणा राखेकाले पार्टीले पनि सोही अनुसार अघि बढ्ने नीति लिएको उनको भनाई थियो ।
महराले भने, राष्ट्रपतिको विषयमा राष्ट्रिय सहमति कायम गर्ने धेरै कमरेडहरूको आवाज आएको छ । राष्ट्रिय सहमति कहाँ हुन्छ ? राष्ट्रिय सहमति खोज्ने हाम्रो नीति छ । राष्ट्रिय सहमति हुन्छ कि हुँदैन ? त्यो बाँकी छ । उनले थपे, राष्ट्रिय सहमति कायम गर्न पहल गर्ने हो ।
आज बसेको बैठकले राष्ट्रपति निर्वाचन, अन्य दलहरूसँगको एकता र पार्टी संगठन लगायत विषयमा छलफल भएको थियो । बिहीबार बसेको बैठकमा प्रधानमन्त्री एवम् पार्टी अध्यक्ष पुष्पकमल दाहालले राष्ट्रपति निर्वाचनमा सहमति जुटाउने प्रयास भइरहेको जानकारी दिएका थिए ।
आजको बैठकमा पनि सोही विषयसहित सरकारका काम कारबाही तथा आन्तरिक संगठन लगायत विषयमा छलफल भएको जनाइएको छ । बिहीबारबाट सुरु भएको माओवादी केन्द्रको स्थायी समिति बैठक १६ गते आइतबार बिहान ११ बजेका लागि पुनः बोलाइएको छ ।
