काठमाडौं। नेपाली कांग्रेसका सभापति तथा पूर्वप्रधानमन्त्री शेरबहादुर देउवा र उनकी पत्नी आरजु राणा देउवा गएराति स्वास्थ्य उपचारका लागि सिंगापुर प्रस्थान गरेका छन्। उनीहरू काठमाडौंस्थित त्रिभुवन अन्तर्राष्ट्रिय विमानस्थलबाट सिंगापुर एयरलाइन्समार्फत सिंगापुर पुगेका हुन्।
आज बिहान सिंगापुरको चाङ्गी अन्तर्राष्ट्रिय विमानस्थलमा ओर्लिने क्रममा देउवा दम्पती ह्विलचेयरमा देखिएका थिए, जसपछि उनीहरूको स्वास्थ्य अवस्थाबारे विभिन्न अड्कलबाजी फैलिएका छन्। सभापति देउवाका स्वकीय सचिव भानु देउवाका अनुसार यो भ्रमण नियमित स्वास्थ्य परीक्षणका लागि हो।
गत भदौ २४ गते बूढानीलकण्ठस्थित देउवा निवासमा ‘जेनजी आन्दोलन’ का क्रममा देउवा दम्पतीमाथि कुटपिट र निवासमा आगजनी भएको थियो। सो घटनापछि उनीहरू लामो समय सार्वजनिक देखिएका थिएनन् र असोज २८ गते मात्रै पार्टीको केन्द्रीय समिति बैठकमा उपस्थित भएका थिए।
सिंगापुर प्रस्थान अघि सभापति देउवाले पार्टीको कार्यवाहक सभापतिको जिम्मेवारी उपसभापति पूर्णबहादुर खड्कालाई तोकेका छन्। यसअघि पनि देउवा स्वास्थ्य उपचारका लागि समय–समयमा विदेश जाने गरेका छन्।
