काठमाडौं । आफूलाई ‘जेनजी अभियन्ता’ भनेर चिनाउने अर्जुनबहादुर शाहीमाथि ठगी र चेक बाउन्सका आरोपहरू थपिंदै गएका छन्। सरकारी निकायका कर्मचारीलाई धम्क्याएको आरोपपछि अहिले उनका आर्थिक कर्तुतहरू एकपछि अर्को गरी सार्वजनिक हुन थालेका छन्। पीडित श्रीकृष्ण फुँयालले टिकटकमा लाइभ आएर शाही र उनको टिमले लाखौं रुपैयाँ ठगेको खुलासा गरेका छन्। फुँयालका अनुसार डेढ वर्षअघि शाहीले अनलाइन टिभी चलाउने बहानामा उनको कोठाबाट दुईवटा क्यामेरा र अन्य उपकरण लगेका थिए। त्यसबापत उनले दुईवटा चेक दिएका थिए — तर ती दुवै बाउन्स भएका छन्।
फुँयालले भने, “बैंक गएर चेक साट्न खोज्दा खातामा एक रुपैयाँ पनि थिएन। पछि सम्पर्क गर्दा शाहीले कोरियामा ठूलो कार्यक्रम भइरहेको र मसँगै जान आग्रह गरे, तर पछि सम्पर्कै टुट्यो।”उनले शाहीविरुद्ध महाराजगञ्ज प्रहरीमा चेक बाउन्सको मुद्दा दायर गरेका छन्। अनुसन्धानका क्रममा शाहीलाई वैदेशिक रोजगार विभागको हिरासतमा कोरिया पठाउने नाममा ठगी गरेको आरोपमा पक्राउ परेको अवस्थामा भेटिएको फुँयालले दाबी गरेका छन्।
शाहीमाथि यसअघि पनि २० लाख रुपैयाँको चेक बाउन्स र सवारीसाधनसम्बन्धी विवाद परेको खुलासा भएको छ। उनी करिब पाँच महिना प्रहरी हिरासतमा बसेपछि धरौटीमा छुटेका थिए।फुँयालका अनुसार, धरौटीमा छुटेपछि शाही फरार बनेका थिए, तर हालै ‘जेनजी आन्दोलन’मा अगुवा अभियन्ताका रूपमा देखिएपछि उनी फेरि चर्चामा आएका हुन्।
फुँयालले भने, “शाही दुई साताअघि मात्रै धरौटीमा बाहिर आएका थिए। अहिले आफूलाई आन्दोलनकारी भनेर प्रस्तुत गर्दैछन्। आवश्यक परे मैले सबै प्रमाण सार्वजनिक गर्छु।” यस घटनापछि ‘जेनजी आन्दोलन’सँग जोडिएका केही व्यक्तिहरूमाथि नै प्रश्न उठ्न थालेका छन्। प्रहरी स्रोतका अनुसार, शाहीविरुद्धका पुराना मुद्दाहरू पुनः अनुसन्धानमा ल्याइने तयारी भइरहेको छ।
