मुस्ताङ।सन् २०२५ को आठ महिनामा मुस्ताङमा एक लाख १६ हजार ७८७ विदेशी पर्यटक भित्रिएका छन्। अन्नपूर्ण संरक्षण क्षेत्र आयोजना (एक्याप) जोमसोमका अनुसार जनवरीदेखि अगस्टसम्म आएका पर्यटकमध्ये एक लाख एक हजार १६१ जना सार्क राष्ट्रका र १५ हजार ६२६ जना अन्य मुलुकका छन्।
एक्यापका प्रमुख राजेश गुप्ताका अनुसार कूल विदेशी आगन्तुकमध्ये ८६.६२ प्रतिशत सार्क मुलुकबाट र १३.३७ प्रतिशत अन्य मुलुकबाट आएका हुन्। यस अवधिमा जनवरीमा ४ हजार ३४६, फेब्रुअरीमा ५ हजार ३०३, मार्चमा १९ हजार ९५, अप्रिलमा २३ हजार १५२, मेमा २५ हजार ७२७, जुनमा २० हजार ८५८, जुलाइमा १० हजार ६१९ र अगस्टमा ७ हजार ६८७ जना पर्यटक मुस्ताङ पुगेका थिए।
गत वर्षको सोही अवधिभन्दा यो वर्ष विदेशी पर्यटक २१.९८ प्रतिशतले बढेका छन्। २०२४ को जनवरी–अगस्टमा ९१ हजार १०९ विदेशी मुस्ताङ आएका थिए भने यसपटक २५ हजार ६७८ जना बढी आएका छन्। सार्क मुलुकका पर्यटक २२.१४ प्रतिशत र अन्य मुलुकका पर्यटक २०.९७ प्रतिशतले वृद्धि भएको तथ्याङ्क छ।
सन् २०२४ मा मुस्ताङमा एक वर्षमै १ लाख २५ हजार ७१९ विदेशी पर्यटक आएका थिए। तीमध्ये ८० प्रतिशत भारतीय पर्यटक रहेको र अधिकांश मुक्तिनाथ मन्दिर दर्शनका लागि आएका हुने कार्यालयको विवरणले देखाएको छ।
बेनी–जोमसोम सडक सहज बन्दै गएको र अन्तर्राष्ट्रिय सञ्चारमाध्यमले मुस्ताङलाई प्रमुख गन्तव्यको सूचीमा राख्दै आएको कारण पछिल्लो समय यहाँ आन्तरिक र बाह्य पर्यटकको संख्या तीव्र रूपमा बढ्दै गएको सरोकारवालाहरूको भनाइ छ। धार्मिक–सांस्कृतिक सम्पदा, ऐतिहासिक दरबार, गुम्बा, गुफा, तालतलैया र अनौठो भूगोलकै कारण मुस्ताङ पर्यटकीय आकर्षणको केन्द्र बन्दै गएको छ।
