काठमाडौँ – गर्मी मौसममा तरबुजा खान सबैलाई मनपर्छ । यो जुसले भरिएको फलले शरीरलाई चिसो मात्र होइन, पानीको कमी पनि पूर्ति गर्छ । तर, धेरैजसो मानिसहरूले तरबुजाको कालो दाना फालिदिन्छन्, जुन वास्तवमा स्वास्थ्यका लागि निकै लाभदायक हुन्छन्।
अनुसन्धानले देखाएको छ कि तरबुजाका यी साना दानामा धेरै पोषक तत्वहरू हुन्छन् जसले शरीरमा विभिन्न प्रकारका फाइदा पुर्याउँछन्।
पेट र पाचनको लागि
तरबुजाको दानामा प्रशस्त मात्रामा फाइबर हुन्छ जसले पाचन प्रणालीलाई स्वस्थ राख्न मद्दत गर्छ। कब्जियत भएका व्यक्तिले यसको सेवनले पेट सफा राख्न सक्छन्। विशेषगरी, सुकेको दानालाई पिसेर धूलो बनाएर बिहान खाली पेट मनतातो पानीसँग खानु लाभदायक हुन्छ।
मधुमेह नियन्त्रणमा
तरबुजाको दानामा पाइने म्याग्नेसियमले रगतमा चिनीको मात्रा सन्तुलनमा राख्छ। यी दानाले इन्सुलिन संवेदनशीलता बढाएर मधुमेह नियन्त्रणमा मद्दत पुर्याउँछ। २ कप पानीमा १ चम्चा दाना उमालेर छानेर दिनमा एकपटक चिया बनाएर पिउन सकिन्छ।
मुटु स्वास्थ्यका लागि
ओमेगा–६ फ्याटी एसिड र म्याग्नेसियमले भरिएको तरबुजाको दानाले कोलेस्ट्रोललाई नियन्त्रणमा राखेर हृदयघातको जोखिम कम गर्छ।
छाला र कपालका लागि
जिंक, प्रोटीन र आइरनले भरिपूर्ण यी दानाले छालालाई चम्किलो र कपाललाई बलियो बनाउँछ। तरबुजाका दानाको तेल पनि बजारमा उपलब्ध छ, जुन अनुहार र कपालमा प्रयोग गर्न सकिन्छ।
रोग प्रतिरोधात्मक क्षमता बढाउने
तरबुजाका दानामा आइरन, म्याग्नेसियम र फस्फोरस जस्ता तत्वहरूले रोग प्रतिरोधात्मक क्षमता बढाउँछन्। यसको नियमित सेवनले भाइरल संक्रमणबाट पनि बचाउन सक्छ। भुटेर वा पाउडर बनाएर दूध वा पानीमा मिसाएर सेवन गर्न सकिन्छ।
यसरी, गर्मीमा तरबुजा खानुका साथै यसको दाना पनि उपयोगी र स्वास्थ्यवर्धक साबित हुन्छ। अगाडि बढेर यसको फाइदा लिनु उपयुक्त हुनेछ।
