भारतको बिहारमा आतंकवादी खतरा बढेको समाचार सार्वजनिक भएको छ। भारतीय सञ्चार माध्यमका अनुसार प्रहरी मुख्यालयले प्राप्त विशेष सूचनापछि सम्पूर्ण राज्यमा उच्च सतर्कता जारी गरिएको छ।
सूचना अनुसार पाकिस्तानस्थित प्रतिबन्धित संगठन जैश–ए–मोहम्मदसँग सम्बन्धित तीन आतंककारी नेपाल हुँदै बिहार प्रवेश गरेका छन्। उनीहरूको परिचय क्रमशः रावलपिन्डीका हसनैन अली, उमरकोटका आदिल हुसेन र बहावलपुरका मोहम्मद उस्मानका रूपमा भएको बताइएको छ।
गुप्तचर स्रोतका अनुसार ती आतंककारीहरू अगस्ट दोस्रो सातामा काठमाडौं पुगेका थिए र गत हप्तामै नेपाली सीमा पार गरी बिहार प्रवेश गरेका हुन्। यसबारे प्रहरी मुख्यालयले सीमावर्ती जिल्लाका प्रशासन र सुरक्षा निकायहरूसँग पासपोर्टलगायत विवरण साझा गर्दै उच्च सतर्कता अपनाउन निर्देशन दिएको छ।
विशेष गरी नेपालसँग जोडिएका नाका तथा सीमा क्षेत्रहरूमा सुरक्षा कडा पारिएको छ। गुप्तचर निकायहरूले यी आतंककारीहरूले बिहारमा चुनावलाई लक्षित गरी भीडभाड भएका कार्यक्रम वा राजनीतिक सभामा हमला गर्ने सम्भावना रहेको चेतावनी दिएका छन्।
यसै सन्दर्भमा प्रहरी महानिरीक्षकस्तरसम्मका अधिकारीहरूले सबै जिल्लाका प्रहरी कप्तानलाई सतर्क रहन, शंकास्पद गतिविधिमा निरन्तर निगरानी राख्न र कुनै सुराक भेटिए तत्काल कारबाही गर्न निर्देशन दिएका छन्। अहिले बिहार प्रहरी पूर्ण सतर्कता मोडमा छ भने सीमावर्ती क्षेत्रमा खोजी अभियान तीव्र पारिएको छ।
यद्यपि भारतीय पक्षले तीन पाकिस्तानी आतंककारी नेपाल हुँदै भारत प्रवेश गरेको दाबी गरे पनि नेपाल सरकार वा नेपाली प्रहरी पक्षले यसबारे कुनै आधिकारिक प्रतिक्रिया दिएका छैनन्।
