काठमाडौं, भदौ २ – भारतका विदेश सचिव विक्रम मिस्रीले भदौ १ देखि २ गतेसम्म नेपालको औपचारिक भ्रमण सम्पन्न गरेका छन्। नेपालका परराष्ट्र सचिव अमृत बहादुर राईको निमन्त्रणामा भएको उक्त भ्रमणका क्रममा उनले नेपालका उच्च पदस्थ व्यक्तित्वहरूसँग भेटवार्ता गरेका छन्।
भ्रमणका क्रममा विदेश सचिव मिस्रीले राष्ट्रपति रामचन्द्र पौडेल, प्रधानमन्त्री केपी शर्मा ओली, परराष्ट्रमन्त्री डा. आरजु राणा देउवा तथा अन्य वरिष्ठ राजनीतिक नेताहरूसँग शिष्टाचार भेट गरेका थिए। भेटवार्तामा उनले भारतको नेतृत्वको शुभकामना व्यक्त गर्दै नेपाल–भारतबीचका द्विपक्षीय सहकार्यका विभिन्न क्षेत्रमा हालसम्म भएको प्रगतिबारे जानकारी गराएका थिए।
विदेश सचिव मिस्रीले प्रधानमन्त्री ओलीलाई भारतका प्रधानमन्त्री नरेन्द्र मोदीको तर्फबाट निकट भविष्यमै भारत भ्रमणको लागि औपचारिक निमन्त्रणा हस्तान्तरण गरेका छन्। यसअघि दुई देशका विदेश सचिवबीच भएको विस्तृत छलफलमा द्विपक्षीय सम्बन्ध सुदृढीकरण, भौतिक तथा डिजिटल कनेक्टिभिटी, ऊर्जा, रक्षा र सुरक्षा लगायतका विषयमा प्रगतिको समीक्षा गरिएको छ।
यसै क्रममा विदेश सचिव मिस्रीले नेपाली सेनाका प्रधान सेनापति महारथी अशोक राज सिग्देललाई भेटी, सेनालाई लाइट स्ट्राइक भेहिकल (एलएसभी), क्रिटिकल केयर मेडिकल उपकरण तथा सैन्य प्रयोजनका जनावरहरू हस्तान्तरण गरेका छन्।
दुवै पक्षले हालका वर्षहरूमा द्विपक्षीय सहकार्यका विविध क्षेत्रमा हासिल प्रगतिप्रति सन्तोष व्यक्त गर्दै आगामी दिनमा अझ घनिष्ठ साझेदारी गर्ने प्रतिबद्धता व्यक्त गरेका छन्।
छिमेकी पहिलो नीतिअन्तर्गत नेपाललाई भारतले प्राथमिकतामा राखेको र विदेश सचिवको यस भ्रमणले दुई देशबीचको नियमित उच्चस्तरीय आदानप्रदानलाई थप सुदृढ बनाएको बताइएको छ।
