भावी विदेशमन्त्रीका लागि दावेदार मानिएका एक वरिष्ठ चिनियाँ कूटनीतिज्ञलाई अधिकारीहरूले सोधपुछका लागि हिरासतमा लिएको वाल स्ट्रिट जर्नलले आइतबार रिपोर्ट गरेको छ ।
विदेशी राजनीतिक दलहरूसँगको सम्बन्धको निरीक्षण गर्ने सत्तारूढ कम्युनिस्ट पार्टीअन्तर्गतको विभागका प्रमुख लिउ जियानचाओलाई जुलाईको अन्त्यमा विदेशको कार्य भ्रमणबाट बेइजिङ फर्केपछि ‘लगिएको’, यस मामिलासँग परिचित व्यक्तिहरूका अनुसार रिपोर्टमा उल्लेख छ ।
उहाँको हिरासतको कारण निर्धारण गर्न नसकिएको रिपोर्टमा जनाइएको छ । चिनियाँ विदेश मन्त्रालयले उक्त रिपोर्टको पुष्टि गर्न एएफपीले गरेको अनुरोधको तुरून्त जवाफ दिएको छैन ।
एकसठ्ठी वर्षीय लिउले यसअघि फिलिपिन्स र इन्डोनेसियाका लागि राजदूत र विदेश मन्त्रालयका प्रवक्तासहित प्रमुख कूटनीतिक भूमिकामा काम गरिसक्नुभएको छ । उहाँले राष्ट्रपति सी जिनपिङको भ्रष्टाचार विरुद्धको विशिष्ट अभियान कार्यान्वयन गर्ने जिम्मेवारी भएका विभिन्न राष्ट्रिय र क्षेत्रीय निकायहरूको नेतृत्व पनि गर्नुभएको छ ।
उहाँको हिरासतले किन गाङपछि चिनियाँ कूटनीतिज्ञको उच्च–स्तरको अनुसन्धानको प्रतिनिधित्व गर्दछ । किनलाई सन् २०२३ मा विवाहेतर सम्बन्धको रिपोर्टपछि विदेशमन्त्रीको पदबाट हटाइएको थियो ।
लिउलाई चिनियाँ कूटनीतिक संसारमा उदीयमान व्यक्तित्वका रूपमा व्यापक रूपमा हेरिएको थियो । जुलाईको सुरुमा उहाँले संयुक्त राज्य अमेरिकाका रक्षामन्त्रीमाथि चीनको सामना गर्न आफ्ना सेनालाई बलियो बनाउन अमेरिकी सहयोगीहरूलाई आग्रह गरेर ‘टकराव र द्वन्द्व उक्साएको’ आरोप लगाउनुभएको थियो ।
गत महिनाको अन्त्यमा धेरै अफ्रिकी देशहरू, सिङ्गापुर र अन्यत्र भएका बैठकहरूपछि उहाँको सबैभन्दा पछिल्लो सार्वजनिक सहभागिता जुलाई २९ मा अल्जेरियामा भएको थियो ।
