काठमाडौं– जिल्ला प्रहरी परिसर काठमाडौं प्रमुख बरिष्ठ उपरिक्षक (एसएसपी) विश्व अधिकारी र उपत्यका अपराध अनुसन्धान कार्यालयका रमेश बस्नेतले राजधानीलाई गुन्डागर्दीमुक्त बनाउने अभियान थालेपछि नयाँ तरङ्ग सुरु भएको छ।
काठमाडौंमा गुन्डागर्दी गर्नेहरू अन्डरग्राउन्ड हुन थालेका छन्। पछिल्लो समय उनीहरुले डर त्रास देखाउनेगरी सामाजिक सञ्जाल फेसबुकको रिल, टीकटकलगायतमा भिडिओमा संगठीत सञ्जाल देखाउनेदेखि सडक नै कब्जा गरेर जन्मदिन मनाउनेसम्मका गतिविधि गरेका थिए।
यस्तै ठमेलमा झैझगडा गर्नेदेखि कुटपिट, रड हान्नेसम्मका गतिविधि सुरु भैसकेका थिए। ‘यो अप्रेशन रोकिँदैन, हामीले सबैको लिस्ट गरेका छौं, निगरानीमा राखेका छौं’, एसएसपी अधिकारी भन्छन्,‘प्रहरीले राजधानीलाई आतंक गर्ने ठाउँ बन्न दिनेछैन।’
यसक्रममा प्रहरीले सानोभाई भनिने युवराज गुरुङलाई पक्राउ गरेको भोलीपल्ट नै कथित डन मिलन गुरुङ (चक्रे) र उनको समूहमा आवद्ध केहीलाई पक्राउ गरी छानबिन जारी राखेको छ।
यो उपक्रममा उपत्यका प्रहरीले सञ्चालन गरेको ‘गुण्डा अपरेशन’ का क्रममा ठमेलस्थित क्लब ओम्नियाका सञ्चालक राजेन्द्र गुरुङ पक्राउ गरिएको छ।
उनलाई काठमाडौं उपत्यका अपराध अनुसन्धान कार्यालयले शनिबार दिउँसो सामाखुसीस्थित घरबाटै नियन्त्रणमा लिएको थियो।
बुधबार राति ठमेलकै नगरकोट दोहोरीमा दुई गुण्डा समूहबीच झडप हुँदा ‘सानुभाइ’ का नामले चिनिने पटक्के गुण्डा युवराज गुरुङसहित तीनजना पक्राउ परेका थिए।
शनिबार पक्राउ परेका क्ल्ब ओम्नियाका सञ्चालक सोही घटनासँग सम्बन्धित रहेको प्रहरीले जनाएको छ।
बुधबार राति नगरकोट दोहोरीबाट नुवाकोट, ककनी गाउँपालिका–५ का युवराज गुरुङसहित नुवाकोट, सूर्यगढी नगरपालिका–२ का ३० वर्षीय रवीन्द्र गुरुङ र पाँचथर फिदिम नपा– १० का २६ वर्षीय दीलकुमार तुम्बाफो पक्राउ परेका थिए।
२०८० साउनमा ओम्निया क्लबमा भएको झडपमा ‘सानुभाइ’ का नामले चिनिने पटक्के गुण्डा युवराज गुरुङले उक्त क्लबका सञ्चालक राजेन्द्र गुरुङमाथि आक्रमण गरेका थिए।
प्रहरीद्वारा पक्राउ गरिएका ‘सानुभाइ’ साउन १० मा धरौटीमा रिहा भए। गत बुधबार उनै ‘सानुभाइ’ नगरकोट दोहोरीमा रहेको सूचना पाएपछि उनीमाथि आक्रमण गर्न ओम्नियाका सञ्चालक गुरुङले रवीन्द्र गुरुङ र दीलकुमार तुम्बाफोलाई पठाएका थिए।
उनीहरू पक्राउ परेपछि बयानका क्रममा ओम्नियाका सञ्चालक गुरुङले पठाएर गएको भनेपछि उनी पक्राउ परेको बताइएको छ।
‘अपराध र आतंक मच्चाउनेलाई त कुनै पनि हिसाबमा कानुनले छुट दिँदैन, दिनु हुँदैन। प्रहरीको काम शान्ति सुरक्षा कायम गराउने हो’, एसएसपी अधिकारी भन्छन्,‘यसमा नागरिकलाई ढुक्क बनाउने जिम्मा प्रहरीले लिन्छ। प्रहरीले नियमित काम गरिरहेको छ।’
