पोखरा, २८ कात्तिक । पाँच दलीय गठबन्धनको तर्फबाट कास्की निर्वाचन क्षेत्र नं ३ (१) बाट प्रदेश सभा सदस्यका उम्मेदवार दुर्गादत्त भण्डारीले बढ्दो महंगी नियन्त्रण गर्न आफ्नो भूमिका सक्रिय रहने बताउनुभएको छ । चुनाव प्रचारप्रसारको अभियान अन्तरगत पोखराको विन्ध्यवासिनी क्षेत्रको घरदैलो कार्यक्रममा सोमबार उम्मेदवार भण्डारीले खाद्य सामग्री लगायत सबै सामग्रीमा अत्याधिक रुपमा मूल्य बृद्धि भएकै कारण जनताको जीवन असहज बनेको अवस्थामा त्यसलाई न्यूनीकरण गर्ने प्रतिवद्धतो व्यक्त गर्नुभयो ।
‘राष्ट्रिय तथा अन्तर्राष्ट्रिय कारणले जनताको जीवन असहज हुने गरी बढेको मुख्यवृद्धि प्रति जनता रुष्ट छन् । न्यून आय भएका नागरिकलाई हातमुख जोर्न समेत धौ धौ छ ।’ महंगी नियन्त्रण प्रदेश स्तरबाट नै समाधान गर्न सकिने र आफू विजयी भएमा गण्डकी प्रदेशमा महंगी नियन्त्रण गर्न अभियान नै चलाउने प्रतिवद्धता उहाँको छ । उहाँले भन्नुभयो– ‘म पनि सामान्य परिवारको मान्छे भएकाले गहिरो अनुभुति मलाई पनि छ । हामी विजयी भएर गईसकेपछि मूल्यवृद्धि रोक्न र जनतालाई महङ्गीबाट राहत दिने कार्यक्रम ल्याउछु ।’
उम्मेदवार भण्डारीले पाँच वर्ष स्थिर सरकार बनाएर विकास र समृद्धिको नेतृत्व पाँच दलीय गठबन्धनलले गर्ने बताउँदै आफूलाई मत दिन समेत मतदातासँग आग्रह गर्नुभयो । अबको युग समृद्धिको युग बन्ने उल्लेख गर्दै संघ, प्रदेश र स्थानीय तहमा गठबन्धनको सरकार बन्ने र सो सरकारले समृद्धिसहित सुशासन दिने उहाँले स्पष्ट पार्नुभयो ।
