काठमाडौं ।उपप्रधानमन्त्री एवं शहरी विकास मन्त्री प्रकाशमान सिंहले नेकपा एमाले र नेपाली कांग्रेसबीच भएको सात बुँदे सहमतिलाई कम नआँक्न चेतावनी दिएका छन्।
बिहीबार काठमाडौंमा आयोजित कार्यक्रममा उनले भने, “स्थायित्व, स्थिरता र सुशासन दिनका लागि दुई ठूला दल मिलेर सरकार बनाएको हो। जनताले अस्थिरता बढेको र सुशासन कायम हुन नसकेको गुनासो गरेपछि यस्तो गठबन्धन आवश्यक भएको हो।”
सिंहले वर्तमान सरकारले ६ महिनाभित्र बारम्बार सरकार परिवर्तन हुने अवस्था तोडेर अघि बढेको बताए। उनले निर्वाचन सकिएपछि काँग्रेसभित्रका परिस्थिति र आन्दोलनको सन्दर्भ समेत उल्लेख गर्दै, “मन्त्री, उपप्रधानमन्त्री र सांसद बन्नका लागि पार्टीमा आवद्ध भएको होइन, आन्दोलनमार्फत जनताको अधिकार पुनःवहाली गरिएको हो। अबको काम ती अधिकार सुरक्षित गर्नु हो,” भने।
उनले राजनीतिक स्थिरता कायम गर्न देशको दुई मुख्य दल नेकपा एमाले र नेपाली कांग्रेस मिलेर अन्य दलहरूलाई पनि समेट्दै गठबन्धन सरकार चलाइरहेको बताए। “नत्र सरकार ६ महिनामा पटक–पटक परिवर्तन हुँदै जान्थ्यो। जनताले सरकार बनेपछि दिनगन्ती शुरु हुन्छ र काम कसरी गरिन्छ भनेर हेर्न थालेका छन्। त्यसैले वर्तमान गठबन्धन आवश्यक भयो,” उनले जोड दिए।
उपप्रधानमन्त्री सिंहले नेपाली कांग्रेसलाई विधि, नियमसम्मत तरिकाले व्यवस्थित गरी अघि बढाउनुपर्नेमा जोड दिए। काँग्रेसलाई चुनौतिहरू सामना गर्न सक्षम बनाउन आफूले त्यस्तो प्रयास गरिरहेको पनि बताए।
